Ոստիկանները խոչընդոտում են մեր հավաքը. Զարուհի Փոստանջյան
Նմանատիպ
Նախագահական ընտրությունների արդյունքները մերժող, նախագահի նախկին թեկնածու Րաֆֆի Հովհաննիսյանն այսօր Սյունիքի մարզկենտրոն Կապանում հանդիպել է իր համակիրների հետ:
Սա արդեն Րաֆֆի Հովհաննիսյանի երկրորդ մարզային այցելությունն է Սյունիքի մարզ:
Վերջինս փետրվարի 18-ից սկսել է իր բողոքի ակցիաները: Նա իր մարզային այցելությունները դադարեցրել էր՝ սկսելով հացադուլ: Հարության տոնին նա դադարեցրեց հացադուլը՝ վերսկսելով մարզային այցելությունները:
Կապանի կենտրոնական հրապարակում համակիրների հետ հանդիպմանը ելույթով հանդես եկավ նաև ԱԺ «Ժառանգություն» խմբակցության պատգամավոր Զարուհի Փոստանջյանը:
Քանի որ մի քանի րոպե համակիրները սպասել էին Րաֆֆի Հովհաննիսյանին, Փոստանջյանն իր ելույթը սկսեց այսպես. «Սիրելինե՛րս, Դուք միշտ սպասելու եք, և Րաֆֆին գալու է»:
Զարուհի Փոստանջյանը պնդեց, որ ոստիկանները խոչընդոտում են իրենց հավաքը:
Նրա խոսքերով՝ ոստիկանները նկարում են ներկաներին, այնուհետև այն ներկայացնում են մարզպետին:
ԱԺ «Ժառանգություն» խմբակցության պատգամավորը ոստիկաններին զգուշացրեց նաև, որ նրանց գործունեությունն ապօրինի է, և եթե շարունակեն, կկանչվեն պատասխանատվության: