Հայաստանն ու հայությունը հստակ չեն ձևակերպել, թե ինչ ձևաչափով են ճանաչում և կոնկրետ ինչ են պահանջում Թուրքիայից. Ա. Շաքարյան
Նմանատիպ
«Հայոց ցեղասպանության ճանաչումը գրոշ չարժե, եթե ճանաչմանը չի հաջորդելու հատուցում: Ճանաչումը հայացք է դեպի անցյալ, մեզ պետք են քայլեր, որ ուղղված են դեպի ապագան»,- այսօր լրագրողների հետ հանդիպմանն անդրադառնալով Հայոց ցեղասպանության ճանաչմանն ու դատապարտմանը, նշեց թուրքագետ Արտակ Շաքարյանը:
Ըստ Շաքարյանի՝ Հայաստանն ու հայությունը հստակ չեն ձևակերպել, թե ինչ ձևաչափով են ճանաչում և կոնկրետ ինչ են պահանջում Թուրքիայից:
«Եթե մենք խոսում ենք դրամական փոխհատուցման մասին, ապա հստակ չէ, թե որ ինստանցիաներից, որքան և ում պետք է փոխհատուցվի: Դրամը պետք է փոխանցվի վերապրածների ժառանգների՞ն, թե՞ ՀՀ-ին ու Սփյուռքին: Դա չգիտենք: Իսկ եթե խոսում ենք հողային պահանջների մասին, ապա կրկին միասնական կարծիք չկա, թե հող ասելով ինչ նկատի ունենք»,- ասաց թուրագետը:
Նա ընդգծեց, որ անհրաժեշտ է հայության ներքին միասնական մոտեցում, թե ինչ ենք պատկերացնում Հայոց ցեղասպանության համար հատուցում ասելով: Շարունակելով իր խոսքը՝ նա կարևորեց Կանադայում ՀՀ նախկին արտակարգ և լիազոր դեսպան Արա Պապյանի առաջ քաշած պահանջները, որը վերաբերում է Սևրի պայմանագրով նախատեսված Հայաստանի սահմաններին և ավելացրեց. «Չխոսենք, թե դա իրատեսական է, թե ոչ, բայց այդ պահանջները մի նշաձող է, որից կարելի է սկսել երկխոսությունը: Հայ ժողովրդի համար էական է զարգացման համար հնարավորինս լավ հնարավորությունների ապահովումը»:
Հետևեք մեզ նաև Telegram-ում