«Իմ քայլը» նախաձեռնության անդամները ԵՊՀ-ում հանդիպում էին պահանջում ռեկտորի հետ

«Քաղաքացական պայմանագիր» կուսակցության «Իմ քայլը» նախաձեռնության անդամները, ովքեր քայլերթով շարժվում են Ազատության հրապարակ, Ազգային ժողովի «Ելք» խմբակցության ղեկավար Նիկոլ Փաշինյանի գլխավորությամբ ներխուժեցին Երևանի պետական համալսարանի կենտրոնական մասնաշենք: Նիկոլ Փաշինյանը հանդիպում էր պահանջում Երևանի պետական համալսարանի ռեկտոր Արամ Սիմոնյանի հետ:

ԵՊՀ անվտանգության ղեկավարը դեռևս դրսում գտնվող նախաձեռնության անդամներին հայտնեց, որ Արամ Սիմոնյանը պատրաստ է հանդիպել Նիկոլ Փաշինյանի հետ, և վերջինիս խնդրեց միայնակ բարձրանալ ռեկտորի աշխատասենյակ: Նիկոլ Փաշինյանը, սակայն, պնդում էր, որ միայնակ չի բարձրանալու, այլ ակցիայի մասնակից բոլոր քաղաքացիների և լրագրողների հետ: Սակայն համալսարանի անվտանգության աշխատակիցները շարունակում էին պնդել, որ Նիկոլ Փաշինյանը պետք է միայնակ բարձրանա:

Երկար բանակցություններից հետո նախաձեռնության անդամները կարողացան բացել ԵՊՀ կենտրոնական մասնաշենքի դուռն ու ներս մտնել: Նրանք բարձրացան 5-րդ հարկ, որտեղ գտնվում է ԵՊՀ ռեկտորի աշխատասենյակը: Նիկոլ Փաշինյանն այս անգամ սկսեց պնդել, որ Արամ Սիմոնյանի հետ կհանդիպի միայն լրատվամիջոցների ներկայությամբ: ԵՊՀ անվտանգության աշխատակիցները շարունակում էին պնդել, որ Փաշինյանը միայնակ մտնի ռեկտորի աշխատասենյակ: Շուրջ 10-15 րոպե ԵՊՀ ռեկտորի աշխատասենյակի մոտ մնալուց հետո ակցիայի մասնակիցները դուրս եկան շենքից:

«Արմենպրես»-ի հետ զրույցում Երևանի պետական համալսարանի մամուլի խոսնակ Գևորգ Էմին-Տերյանն, անդրադառնալով ԵՊՀ-ում դասադուլի մասին մամուլում շրջանառվող լուրերին, տեղեկացրեց, որ ապրիլի 13-ի առավոտյան մոտ երկու տասնյակ ուսանողներ ԵՊՀ բակում դասադուլի կոչեր են հնչեցրել, սակայն շենք մուտք գործելու և դասապրոցեսը խանգարելու փորձ չեն ձեռնարկել, հետևաբար՝ նրանց ոչ ոք չի խոչընդոտել իրազեկում իրականացնելու հարցում: «Չեմ բացառում, որ մի քանի ուսանող միացած լինի ակցիային, սակայն քանի որ այն չափազանց սակավամարդ է, և ԵՊՀ-ից էլ ոչ մի պահանջ չկա, կարելի է փաստել, որ դասական իմաստով դասադուլ չկա»,- ասաց ԵՊՀ մամուլի խոսնակը: