Հայաստանի Հանրապետության նորընտիր վարչապետ Սերժ Սարգսյանը շնորհակալություն հայտնեց Հայաստանի հանրապետական կուսակցության և Հայ հեղափոխական դաշնակցության իր գործընկերներին երկրի վարչապետի պաշտոնում իր թեկնածությունն առաջադրելու և Ազգային ժողովում պաշտպանելու համար:
Այս մասին Սերժ Սարգսյանն ասաց ընտրությունից հետո ԱԺ ամբիոնից իր ելույթի ժամանակ:
«Մենք որպես քաղաքական կոալիցիա լուրջ պատասխանատվություն ենք ստանձնել, գիտակցում ենք դրա մասշտաբները և համադրված հետևողական աշխատանքով պատրաստ ենք առաջ գնալ հայրենիքի զարգացման և մեր ժողովրդի համար ավելի որակյալ կյանքի պայմաններ ապահովելու ճանապարհով»,- ասաց ՀՀ վարչապետը:
Նա իր շնորհակալությունը հայտնեց «Ծառուկյան» դաշինքի բոլոր գործընկերներին՝ վստահեցնելով, որ նրանց պատվախնդիր գործունեությունը խորհրդարանում քաղաքական կոալիցիայի համար միշտ հսկիչ դեր է ունեցել: «Դուք կարողացել եք վեր կանգնել «մենք ընդդիմադիր ենք և ամեն ինչ պետք է քննադատենք» կամ «միշտ պետք է դեմ քվեարկենք» պարզունակ գործելաոճից: Անհրաժեշտ պահերին ձեր դիրքորոշման հիմքում դրել եք ոչ թե կուսակցական , այլ պետական շահը: Հենց սա գիտակցելով է, որ ձեր քննադատությունն ընկալվում է որպես անաչառ և ստիպում քաղաքականություն իրականացնողներին առաջնահերթ ուշադրություն դարձնել դրան: Հավատացնում եմ՝ իշխանությունը մշտապես իր մեջքին զգում է ձեր աչալուրջ շնչառությունը և դա իսկապես սթափեցնող է»,- ընդգծեց Սարգսյանը:
Դիմելով ընդդիմադիր «Ելք» դաշինքի գործընկերներին և շնորհակալության հայտնելով նրանց՝ ՀՀ նորընտիր վարչապետը նշեց, որ ակտիվ պառլամետնարիզմը կարող է կայանալ միայն ամենօրյա աշխատանքով, մտքերի ու մոտեցումների բախմամբ, համատեղ բարդույթներից զերծ աշխատանքով և մշտապես սովորելով: «Շնորհակալ եմ ձեր դերակատարության համար: Սահմանադրության պահանջով մենք այսուհետ անմիջական շփումների շատ ու շատ առիթներ ենք ունենալու: Հուսով եմ, որ արագ հաղթահարվելու են առկա շատ թյուրըմբռնումներ ու կաղապարված պատկերացումներ, որոնք կան, և անկախ մեր քաղաքական տարաձայնություններից մենք լավ բարեկամներ ենք դառնալու»- հայտարարեց Սերժ Սարգսյանը:
