«Իրատես» թերթը գրում է. «Վարչապետի ընտրությունից հետո «Ծառուկյան» խմբակցությունում, մեր տեղեկություններով, քննարկումների դաշտ է բացվել: Ակնհայտ էր, որ այս քաղաքական ուժը միանման չէր կարող քվեարկել, քանի որ իշխանասերների մեծ բանակ ունի: Հիմա էլ սկսել են մեկիկ-մեկիկ ծանրութեթև անել, թե կողմ քվեարկողներն ինչու են իրենց ընդդիմադիր վարկանիշը գցում: Այն էլ այսօրվա լարվածության ֆոնին, երբ հասարակական մեծ ընդվզում կա, գոնե քվեարկությամբ ձևականությունը պահեին: Վարչապետի ուղիղ եթեր հեռարձակվող ընտրության ժամանակ «Ծառուկյան» խմբակցության նման կեցվածքը խիստ անհանգստացրել է նաև այդ ուժի ընդդիմադիր թևին, քանի որ հասարակական ընկալման մեջ նրանք լիովին կորցրին ընդդիմադիրի համբավը:
«Սրտով» իշխանական ծառուկյանականներից մեկն իր «բախտակից» կուսակցի առաջ նեղվել է. «Բոլոր հարցերում իշխանության հետ եք, բայց ասում են՝ ընդդիմություն խաղա, ու՞մ ենք խաբում»: «Կարեն Կարապետյանը, որ վարչապետ ընտրվեց, գնացի բարևեցի, շնորհավորեցի, սարքեցին մի մեծ պատմություն: Հիմա որ խմբակցության կեսը Սերժ Սարգսյանին է բացահայտ ընտրել, ինչու՞ էդքան վատ չեն տանում»:
Ի դեպ, վարչապետի ընտրության ժամանակ «Ծառուկյան» խմբակցությունը ոչ միայն գործով կիսաընդդիմություն խաղաց, այլև խոսքով՝ ոչ մի սուր ելույթ»:
Մանրամասները թերթի այսօրվա համարում
