Երթևեկության մասնակիցների համար խոչընդոտ ստեղծող ավտոմեքենաները տեղափոխվում են հատուկ տարածք

Երթևեկության մասնակիցների համար խոչընդոտ ստեղծող ավտոմեքենաները տեղափոխվում են հատուկ տարածք

Նիկոլ Փաշինյանի նախաձեռնած հավաքի մասնակիցներից մեկը Երևանի Արշակունյաց պողոտայում շրջեց իր մեքենան փողոցի լայնությամբ և հրաժարվեց շարժվել:

Ճանապարհային ոստիկանության ծառայողները ժամանեցին դեպքի վայր և վարորդին զգուշացրեցին, որ մեքենան դուրս կբերեն հատուկ միջոցներով:

Սակայն վարորդի ակցիային միացավ մի նոր ավտոմեքենա, որը նույնպես, երթևեկելով պողոտայով, շրջեց իր մեքենան հորիզոնական դիրքով ու կայանեց:

Ոստիկանության ծառայողները երկու ավտոքարշակ բերեցին և դրանց օգնությամբ մեքենաները տարան տուգանային հրապարակ: Այդ պահին շրջվեց երրորդ մեքենան եւ նույն հորիզոնական դիրքով փակեց փողոցը: Ոստիկանական ծառայողներին հաջողվեց մտնել մեքենայի խցիկ և վարորդին դուրս բերել մեքենայից, ում ինքնազգացողությունը վատացավ, և նա ուշագնաց եղավ:

ՀՀ ոստիկանության լրատվության և հասարակայնության հետ կապերի վարչության պետ Աշոտ Ահարոնյանը իր ֆեյսբուքյան էջում գրառում է կատարել, որ երթևեկության մասնակիցների համար խոչընդոտ ստեղծող կամ կայանումն արգելված տեղերում կայանած տրանսպորտային միջոցները տեղափոխվում են հատուկ տարածք, եթե վարորդը տեղում չէ կամ հրաժարվում է վերացնել խոչընդոտը, կամ կայանման կանոնների խախտումը (Ճանապարհային երթևեկության անվտանգության ապահովման մասին, ՀՀ օրենք, 18-րդ հոդված, մաս 3):

Հետևեք մեզ նաև Telegram-ում