«Նարեկը»` ամեն հայ ընտանիքի

«Նարեկը»` ամեն հայ ընտանիքի

Նարեկացու Մատյանը` «Նարեկը», մեր ժողովրդի հոգևոր ժառանգության անհատնում գանձերից է: Սուրբ գիրք, որի նկատմամբ բուռն հետաքրքրությունը հասնում է պաշտամունքի աստիճանի: Ժամանակի հետ առավել զորանում ու բյուրեղանում է այդ զգացումը` «Նարեկը» ցանկալի ու սպասված դարձնելով յուրաքանչյուր հայ ընտանիքի, ավանդապահ հայ օջախի համար:

Ի դեպ, Մաքսիմ Ոսկանյանը մեր գրական աշխարհի այն նվիրյալներից է, որ առանձնահատուկ սիրով ու ոգեշնչվածությամբ է վերաբերվում մեծն Նարեկացուն: Դրա խոսուն վկայությունը, թերևս, նրա տքնաջան ու տիտանական աշխատանքի արդյունքում ծնունդ առած «Նարեկի» նոր աշխարհաբար թարգմանությունն է: Բանաստեղծը, բոլորովին նոր մոտեցում ցուցաբերելով Մատյանին, աշխարհաբար հմուտ փոխադրությամբ այն մատուցել է հայ ընթերցողներին: Ռազմիկ Դավոյանի բնութագրմամբ, այս թարգմանությունը ոգեկոչված է բնագրին առավելագույնս հարազատ մնալու միտումով` թե՛ ձևով և թե՛ բովանդակությամբ:
Հարկ է նշել, որ առանձին բարերարների փոքրիշատե օժանդակությամբ Մաքսիմ Ոսկանյանն առայժմ կարողացել է «Նարեկի» որոշ քանակություն տպագրել և նվիրել շրջապատի մարդկանց, ինչը, նրա խոստովանությամբ, շատ քիչ է: Նպատակ ունի հնարավորինս շատ հրատարակել և ընծայաբերել հայ ընտանիքներին: Այն, ինչ խոսք, հրաշալի նվեր է, հատկապես եթե նկատի ունենանք, որ 2019 թվականը Ամենայն հայոց կաթողիկոսի օրհնությամբ հռչակվել է Հայ ընտանիքի տարի:

Մաքսիմ Ոսկանյանին այս աստվածահաճո գործում առաջին ձեռք մեկնողներից մեկը պատվարժան հայորդի Գրիգոր Ծատուրյանն է, որի դրամական աջակցությամբ օրերս լույս է տեսել «Նարեկի» գունավոր շքեղ հրատարակությունը: Հովանավորյալի նպատակն անչափ խրախուսելի և օրինակելի է` գիրքը նվիրել իր մեծ գերդաստանի բոլոր առանձին ընտանիքներին, հարազատ-բարեկամներին, ընկերներին ու ծանոթներին:

Վաչագան ՍԱՐԳՍՅԱՆ

Աղբյուր՝ Iartes.am

Հետևեք մեզ նաև Telegram-ում