Արամ Գրիգորյան. Գազի սակագնի վերաբերյալ կազմակերպված քննարկման կարգավիճակը հստակ հայտնի չէր

Հանրային ծառայությունները կարգավորող հանձնաժողովը բոլորովին ցանկություն չունի լսելու հանրության կարծիքը: Այսօր լրագրողների հետ հանդիպմանը նման կարծիք է հայտնել «Կանխենք գազի թանկացումը» նախաձեռնության ակտիվիստ, ինչպես նաև «Հասարակական պաշտպանների միութան» գործադիր տնօրեն Արամ Գրիգորյանը՝ անդրադառնալով երեկ նույն հանձնաժողովում կազմակերպված քննարկմանը՝ կապված գազի գնի բարձրացման հետ:

Tert.am- փոխանցմամբ’նա նշել է, որ հանձնաժողովը ոչ մի պայման չէր ստեղծել հանրությանը լսելու համար:

«Դահլիճը փոքր էր, սահմանափակ թվով մարդկանց էր տեղավորում, չկար բարձրախոս, որպեսզի մարդիկ իրար հասկանային: Արդյունքում եղավ այնպես, որ հանձնաժողովի նախագահը ուղղակի դադարեցրեց քննարկումը: Հանձնաժողովը հանրությանը հետ աշխատելու որևէ ձև չգիտի»,- ասաց նա և ավելացրեց, որ հանձնաժողովը պարտավոր էր գնի փոփոխության մասին հայտարարել հանրային լսումներ կազմակերպելուց հետո, և ոչ թե առաջ:

Մեկ այլ աղբյուր’ Haynews.am-ը այս թեմայի շուրջ գրում է, որ Արամ Գրիգորյանն նշել է, որ երեկ գազի սակագնի վերաբերյալ կազմակերպված լսումները պատշաճ կերպով չեն անցել:

Հասարակական պաշտպանների միության գործադիր տնօրենը հավելել է, որ կազմակերպված քննարկման կարգավիճակը հստակ հայտնի չէր, քանի որ նշվում էր և որպես հանրային քննարկում, և մասնագետների հանդիպում:

«Կարող եմ ասել, որ գազի սակագինը դեռևս հաստատված չէ: Վարչապետը հայտարարել է 30% սուբսիդավորման մասին, սակայն չի մասնավորեցնում, թե ինչ միջոցներով է դա արվելու»,-նշել է Արամ Գրիգորյանը:

Ըստ նրա’ ՀԾԿՀ-ը պետք է կարգավորի մոնոպոլ շուկան, սակայն, իր տպավորությամբ, այդպիսի հանձնաժողով չկա:

«Հանրության հետ աշխատելու որևէ ձև չգիտի: Այն կատարում է քաղաքական պատվեր: Մեր պահանջն է հանրայնացնել գազի վերաբերյալ կնքված պայմանագիրը»,-ասել է նա:

Բանախոսի համոզմամբ, գազի սակագինը վատագույն հաշվարկներով պետք է մնա նույնը: