Մանուկների օրհնություն` Մայր Աթոռ Ս. Էջմիածնում (լուսանկարներ)

Յունիսի 1-ին’ երեխաների պաշտպանութեան միջազգային օրուայ առիթով, Մայր Աթոռ Սուրբ Էջմիածնում հիւրընկալուեցին Մայր Աթոռի Քրիստոնէական դաստիարակութեան կենտրոնի (ՔԴԿ) եւ ՀՀ Կրթութեան եւ գիտութեան նախարարութեան կողմից համագործակցաբար կազմակերպուած նախադպրոցական ուսումնական հաստատութիւնների (ՆՈՒՀ) «Լաւագոյն տնօրէն» եւ «Լաւագոյն դաստիարակ» հանրապետական մրցոյթի յաղթողները եւ նրանց շուրջ 600 սաները: Մայիսի 25-ին անցկացուած մրցոյթին մասնակցել էին նախապէս յայտ ներկայացրած 44 տնօրէններ եւ 76 դաստիարակներ: Մրցոյթի գրաւոր եւ բանաւոր փուլերի արդիւնքում որոշուել են լաւագոյն տնօրէններն ու դաստիարակները’ իւրաքանչիւր մարզից եւ Երեւանից’ ընդհանուր 11 տնօրէն եւ 11 դաստիարակ:

Այս կապակցութեամբ, հանդիսապետութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի եւ ներկայութեամբ ՀՀ Կրթութեան եւ գիտութեան նախարար Արմէն Աշոտեանի, Մայր Տաճարում տեղի ունեցաւ մանուկների եւ մրցոյթի յաղթողների օրհնութեան արարողութիւնը, որի աւարտին Վեհափառ Հայրապետն իր պատգամը բերեց արարողութեան մասնակիցներին:

«…Սուրբ Աւետարանից տեղեկանում ենք, թէ ինչպեբս մեր Տէր Յիսուս սիրում եւ ջերմութեամբ էր վերաբերւում բոլոր մանուկներին, օրհնում նրանց եւ թոյլ տալիս, որ Իր մօտ գան’ նրանց անարատ էութեան մէջ տեսնելով երկնքի արքայութեան բարիքները կրելու արժանիքը: Մարդկային ազգի փրկութեան համար Քրիստոս կարեւորեց մանկանալու եւ մանկան պարզասրտութեան ու մաքրութեան բարի յատկութիւնները:

Այս մտադրութեամբ է, որ Մայր Աթոռ Սուրբ Էջմիածինը, կարեւորելով մատաղ սերնդի կրթութեան եւ դաստիարակութեան գործում յատկապէս նախադպրոցական ուսումնական հաստատութեան միջավայրում զարգացող եւ հասակ առնող երեխաների կեանքում աստուածսիրութեան եւ հայրենասիրութեան հաստատուն գիտելիքների սերմանման առաքելութիւնը, այս տարի առաջին անգամ ՀՀ Կրթութեան եւ գիտութեան նախարարութեան հետ համագործակցաբար կազմակերպեց եւ իրականացրեց «Լաւագոյն տնօրէն» եւ «Լաւագոյն դաստիարակ» հանրապետական մրցոյթը», – նշեց Հայոց Հայրապետը:

Իր խօսքում Նորին Սրբութիւնն ընդգծեց, որ հարկ է մանուկներին վաղ հասակից կրթել եւ դաստիարակել բարոյական սկզբունքներով, հոգեշահ խրատներով, եւ առաքինագործ կենցաղավարութեամբ բարի օրինակ լինել նրանց’ յաւելելով, որ «երբ մանուկների մտաւոր կրթութիւնն ընթանում է բարոյական եւ հոգեւոր դաստիարակութեան հետ, ապա իմաստնանում են նրանց մանկական ըմբռնումները, եւ նրանց մատաղ սրտերը ձգտում են առաքինութեան մաքրութեան»:

Վեհափառ Հայրապետն իր գնահատանքը յայտնեց ՀՀ ԿԳ նախարարին’ համագործակցութեան եւ Եկեղեցուն ցուցաբերած իր ազնիւ աջակցութեան համար: Նորին Սրբութիւնը նաեւ իր գնահատանքը բերեց մրցոյթի կազմակերպիչներին, բոլոր մրցանակակիրներին եւ նախաձեռնութեան բարերար տիար Տիգրան Յովհաննիսեանին:
Ամենայն Հայոց Կաթողիկոսը մաղթեց, որ Աստուած շնորհազարդի մանուկներին եւ հանապազ օրհնութեամբ պայծառ երկինք եւ իմաստութիւն ու արիութիւն պարգեւի նրանց’ անսայթաք ընթանալու Տիրոջ ճշմարտութեան ճամփաներով, որպէսզի դառնան արժանաւոր յետնորդները մեր փառապանծ հայրերի եւ իրենց կեանքով ու գործով պայծառութիւն բերեն մեր ժողովրդի եւ Հայրենիքի կեանքում’ միշտ մնալով հաւատարիմ զաւակները առաքելահաստատ Հայաստանեայց Առաքելական Սուրբ Եկեղեցու:
Օրհնութեան արարողութեան աւարտին Վեհափառ Հայրապետի եւ ՀՀ ԿԳ նախարարի կողմից պատուոգրեր, գրքեր եւ դրամական պարգեւներ շնորհուեցին լաւագոյնը ճանաչուած տնօրէններին եւ դաստիարակներին:

«Լաւագոյն տնօրէն» անուանակարգում մրցանակների արժանացան Սուետլանայ Մանջոյեանը (Արարատ, Վեդու N 2 մանկապարտէզ), Նունէ Առաքելեանը (Երեւան, Մալաթիայ-Սեբաստիա N 90 մանկապարտէզ), Լիանա Խեչանեանը (Արագածոտն, Աշտարակի Արաքս Մուրադեանի անվ. մանկապարտէզ), Կարինէ Գրիգորեանը (Արմաւիր, Էջմիածնի N 15 մանկապարտէզ), Գայանէ Մնացականեանը (Կոտայք, ք. Հրազդանի N 5 մանկապարտէզ), Լուսինէ Հայրապետեանը (Շիրակ, Մարալիկի համայնքային նախադպրոցական հիմնարկ), Բելլա Կոստանեանը (Սիւնիք, ք. Կապանի N 6 մանկապարտէզ), Արմաիդայ Աբովեանը (Լոռի, ք. Վանաձորի N 35 մանկապարտէզ), Անահիտ Ղարիբեանը (Գեղարքունիք, ք. Սեւան N 3 մանկապարտէզ), Գոհար Պողոսեանը (Վայոց Ձոր, ք. Եղէգնաձորի N 5 մանկապարտէզ), Շուշանիկ Գալստեանը (Տաւուշ, Բերդի N 3 մանկապարտէզ):

«Լաւագոյն դաստիարակ» անուանակարգում յաղթողներն էին Սեդա Սահակեանը (Արարատ, ք. Աշտարակի N 5 մանկապարտէզ), Աղաւնի Համբարձումեանը (Արարատ, գ. Վ. Արտաշատի «Լուսնթագ» մանկապարտէզ), Գիւլնարայ Համբարձումեանը (Երեւան, Դաւթաշենի N 59 մանկապարտէզ), Սաթիկ Ալուալեանը (Արագածոտն, Աշտարակի «Մանուշակ» մանկապարտէզ), Արաքսեայ Ղազարեանը (Արմաւիր, Էջմիածնի N 10 «Շուշան» մանկապարտէզ), Քրիստինէ Վարդանեանը (Կոտայք, ք. Չարենցաւանի «Հրաշք» մանկապարտէզ), Յասմիկ Խաչատրեանը (Շիրակ, ք. Գիւմրու N 21 մանկապարտէզ), Մարգոյ Գրիգորեանը (Սիւնիք, ք. Կապանի N 6 մանկապարտէզ), Սուետլանայ Թումանեանը (Սիւնիք, ք. Գորիս N 2 մանկապարտէզ), Աննա Յակոբեանը (Լոռի, ք. Վանաձորի N 5 մանկապարտէզ), Յասմիկ Մուշեղեանը (Գեղարքունիք, ք. Մարտունու N 3 մանկապարտէզ), Էմմա Բադալեանը (Վայոց Ձոր, ք. Եղէգնաձորի N 5 մանկապարտէզ), Գայանէ Թամրազեանը (Տաւուշ, գ. Հաղարծնի մանկապարտէզ):