Հունիսի 5-ին ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը հանդիպեց ՀՀ-ում Ռուսաստանի Դաշնության դեսպանության խորհրդական Սերգեյ Օվերչենկոյի հետ: Այս մասին հայտնում են ՀՀ Ազգային ժողովի մամուլի ծառայությունից:
Կողմերը համոզմունք հայտնեցին, որ հայ-ռուսական խորհրդարանական համագործակցությունը կարևոր նշանակություն ունի երկկողմ փոխգործակցության ամրապնդման ու խորացման գործում: Այս համատեքստում երկուստեք կարևորվեց ՀՀ ԱԺ-ի և ՌԴ ԴԺ-ի միջև համագործակցության միջխորհրդարանական հանձնաժողովի աշխատանքը: Դրական գնահատվեցին վերջերս ՌԴ-ում անցկացված հայ-ռուսական միջխորհրդարանական համագործակցության կոմիտեի հերթական նիստի աշխատանքները և դրանցում բարձրացված հարցերը:
Հանդիպման ընթացքում զրուցակիցները կարևորեցին տարբեր խորհրդարանական հարթակներում երկու երկրների միջև հարաբերությունների խորացումը, խորհրդարանական դիվանագիտության զարգացումը, օրենսդրական և այլ ոլորտներում փորձի փոխանակման անհրաժեշտությունը:
Հանդիպմանն անդրադարձ եղավ նաև երկկողմ հետաքրքրություն ներկայացնող այլ հարցերի:
