«Հրապարակը» գրում է, թե խաղից, քաղաքական գործընթացներից գրեթե դուրս մնացած ԲՀԿ-ն այսօր խիստ անհասկանալի կարգավիճակում է: Մինչեւ վերջերս խոսք էր գնում, որ կուսակցությունը վերակազմակերպվում է, այնտեղ եւս, ինչպես ՀՀԿ-ում, պետք է ստեղծվի գործադիր մարմին, որը հրատապ ու կոլեգիալ կարձագանքի երկրում, կուսակցությունում, այլուր եւ ամենուր տեղի ունեցող գործընթացներին, որոշումներ կկայացնի, միեւնույն ժամանակ խորը եւ համապարփակ բարեփոխումների կտանի ԲՀԿ-ին:
Ստեղծվե՞լ է այդ կուսմարմինը, ինչո՞վ է այն զբաղված՝ հարցրինք Գագիկ Ծառուկյանի մամլո խոսնակ Իվետա Տոնոյանին: «ԲՀԿ նախագահ Գագիկ Ծառուկյանին կից խորհրդի ձեւավորումն այժմ ընթացքի մեջ է. ձեւաչափն առայժմ նշել չեմ կարող, հարկավոր ժամին, հարկավոր ձեւաչափի մասին տեղյակ կպահվի»:
Հնարավո՞ր է «այս մասին’ վերջին դասին»-ը նույնպես չասվի, ինչպես եղավ նախագահական ընտրություններին մասնակցությունից հրաժարման դեպքում: «Կա քաղխորհրդի որոշում, եւ այդ որոշումը ոչ ոք չեղյալ չի համարել»: Կուտ չի՞ գնա այս մի նախաձեռնությունը եւս, ինչպես ԲՀԿ ընդդիմադիրոտությունը: «Ոչ’ ամենեւին»,- ասաց Իվետա Տոնոյանը:
