«ՀՀ կառավարությանը ներկայացվել է 13 կետից բաղկացած պահանջ, բայց ես առավել կարևորում եմ դրանցից երեքը՝ անվճար բուժօգնություն, ուսման և կոմունալ ծախսերի վճարի կիսում» – այսօրվա ասուլիսի ժամանակ հայտարարեց «Արաբո» ջոկատի ազատամարտիկ, «Արաբո» ՀԿ անդամ Հակոբ Հակոբյանը: Այս մասին գրում է Panorama.am-ը:
Ըստ բանախոսի՝ ներկայումս ազատամարտիկների կողմից նստացույցի դուրս գալը պայմանավորված է սոցիալական ծանր վիճակով: «Բողոքի ակցիայի մասնակցելու համար շատ ազատամարտիկներ մարզերից չեն գալիս, քանի որ չունեն նույնիսկ հարյուր դրամ», – ասաց նա:
Ազատամարտիկի խոսքով՝ խնդիրը կայանում է նրանում, որ ազատամարտիկները եղել են մշտապես անտեսված, որևէ անգամ սոցիալական խնդիրները չէին բարձրաձայնվում:
Հակոբ Հակոբյանը նաև նկատեց, որ ազատամարտիկների մի մասը ներկայացնում են այլ պահանջներ: Նրա խոսքով՝ ազատամարտիկների շարքերը միասնական չեն, իսկ ոմանք փորձում են լուծել անձնական հարցեր: «Դրանք անհատական բողոքներ են, բայց դրանք ևս սոցիալական ծանր վիճակից են», – ասաց նա:
Ըստ բանախոսի՝ ազատամարտիկների սխրանքները փորձել են նսեմացնել նույնիսկ Արցախյան ազատամարտի տարիներին, թեև անհաջող: «Արաբո» ջոկատի մասին ֆիլմ էին նկարահանել նույնիսկ ադրբեջանցիները: Բայց մնում էր փաստ, որ մեր ջոկատի շատ մարտիկների նահատակվելուց հետո նրանք ևս արձանագրեցին, որ ընկավ ընդհանուր մարտական ոգին: Դա նշանակում է, որ նույնիսկ մեր հակառակորդն ընդունում էր մեր առավելությունը», – ասաց ազատամարտիկը:
Ինչպես գրում է Aravօt.am-y, Պարոն Հակոբյանը շեշտեց, որ իր համար այդ խնդիրների շարքում առաջնահերթ է ազատամարտիկների համար անվճար բուժօգնության, ուսման վարձի հիսուն տոկոսի կրճատման, ազատամարտիկների համար անխտիր սոցիալ-կոմունալ ծախսերի հիսուն տոկոսի կրճատման հարցերի լուծումը: Հ. Հակոբյանը մտահոգված է այն փաստով, որ այսօր մեզանում պատմությունը խեղաթյուրվում է:
Այս առիթով նա վրդովված նշեց. «Ի՞նչ գիտի նոր սերունդն արցախյան պատերազմի մասին: Արցախյան պատերազմից քսան տարի անց սերնդին դաստիարակել եք այն ոգով, որ ամեն կուսակցություն, ունի իր հեռուստաալիքը և քարոզում է իրեն: Քսան տարվա ընթացքում տեսնում ենք նույն դեմքերն ու հաղորդումները: Կան մարդիկ, որ սիրում են սազը վերցնել ձեռքներն ու գովերգել:
Այսօր ունենք Աշոտյանի նման նախարար, բայց քանի՞ կրթության նախարար ենք փոխել: Աշոտյանը Ֆրանսիայից բերեց կրթական ռեֆորմ, չէ՞ որ ունենք մերը, որն արդեն աշխարհն է թելադրում: Պատմությունն այսօր խեղաթյուրվել է, մարդիկ կան իրենք իրար պարգևատրում են, ազգի հերոսներ են, բարերարներ են….այդ մարդիկ հարստացան, հասան այն աստիճան, որ իրենք իրենց բարերարներ են համարում»:
Հ. Հակոբյանը համեմատություն անցկացրեց վիետնամական և աֆղանական սինդրոմների հետ՝ նշելով, որ Հայաստանում էլ գործում է հայկական սինդրոմ:
Պարոն Հակոբյանը դատապարտեց նաև Սուրեն Խաչատրյանի հետ կապված միջադեպը՝ հարց հնչեցնելով, թե ինչի՞ համար են նրան պարգևատրել «մարտական խաչ»-ով: Խոսելով հայրենասիրություն գաղափարի մասին՝ ազատամարտիկն ասաց. «Հայրենասեր լինելու համար ոչ մի կուսակցության անդամ լինել պետք չէ, այլ ազգի համար գործ անել է պետք, իսկ կուսակցություններն այսօր զուտ աթոռակռվի համար են»:
