Արտախորհրդարանական կուսակցությունները՝ գերեզմանաքարերի պղծման դեպքի մասին

ԵՐԵՎԱՆ, 1 ՕԳՈՍՏՈՍԻ, Panorama.am: Արտախորհրդարանական կուսակցությունները հաղորդագրություններ են տարածել, որով անդրադարձել են Եռաբլուր զինվորական պանթեոնում գերեզմանաքարերի պղծման դեպքին։

«ՀՅԴ ՀԵՄ-ն այսօր՝ ժամը 20։00-ին, Եռաբլուրում կազմակերպում է մոմավառություն։

Միաժամանակ, դաշնակցական երիտասարդներն իրենց պատրաստակամությունն են հայտնում ՀՀ պաշտպանության նախարարությանը՝ անհրաժեշտության դեպքում իրականացնել շուրջօրյա հերթափոխություն Եռաբլուրի տարածքում»,- ասված է ՀՅԴ տարածած հաղորդագրության մեջ։

«Ազգային օրակարգ» կուսակցության խորհուրդն էլ տեղեկացրել է, որ նույն պատկերն է արձանագրվել Կոտայքի մարզի Զովունի գյուղի գերեզմանատանը։

««Ազգային օրակարգ» կուսակցությունը դատապարտում է այս սրբապղծությունը եւ հույս հայտնում, որ իրավապահ մարմինները շատ արագ կբացահայտեն իրականացնողներին։ Նման արատավոր երևույթները կարող են լրջորեն վնասել մեր հասարակությանը, ուստի մեղավորների րոպե առաջ բացահայտումը պարզապես կենսական անհրաժեշտություն է»։