Արարատյան Հայրապետական թեմը հասարակությանը կոչ է արել չենթարկվել նեղ խմբային շահերը հետապնդողներին

Արարատյան Հայրապետական թեմը հանդես եկել թեմի առաջնորդական փոխանորդ Նավասարդ արքեպիսկոպոս Կճոյանի անվան շուրջ ԶԼՄ-ներում վերջերս տարածված տեղեկատվության պարզաբանմամբ:  Արարատյան Հայրապետական թեմի տարածած հաղորդագրության մեջ, մասնավորապես, նշվում է.

«Անցած երկու տարիների ընթացքում մի շարք լրատվամիջոցներ Արարատյան հայրապետական թեմի առաջնորդական փոխանորդ Նավասարդ արքեպիսկոպոս Կճոյանին վերագրեցին զանազան բացասական որակներ՝ հասարակության մեջ փորձ անելով ձևավորել սրբազանի անձի՝ իրականությունից ամբողջովին կտրված ընկալում: Հավասարակշռության և անկողմնակալության սկզբունքի պահպանման փոխարեն մի խումբ ԶԼՄ-ներ, թերևս միայն իրենց հայտնի պատճառներով, առ այսօր առավել կարևորում են Արարատյան հայրապետական թեմի առաջնորդական փոխանորդին՝ հասարակության կյանքից, նրա հոգսերից ամբողջովին կտրված ներկայացնելը:

Օգտվելով Նավասարդ արքեպիսկոպոս Կճոյանի լռությունից, մամուլի մի խումբ ներկայացուցիչներ անընդհատ մոլորության մեջ են գցում հասարակությանը՝ միևնույն ժամանակ զերծ մնալով սեփական գործողությունների համար որևէ պատասխանատվությունից: Ստեղծված իրավիճակի ցցուն օրինակ կարող է ծառայել երեկ կայքերից մեկում տպագրված Աշոտ Սուքիասյանի հետ գործնական առնչություն ունեցած մի կնոջ հարցազրույց, որտեղ վերջինս հայտարարում է, թե Նավասարդ արքեպիսկոպոս Կճոյանն, իբր, ստել է՝ ասելով, որ Սուքիասյանի հետ վերջին անգամ Նոր տարուն է խ? ?սել, քանի որ 2012թ․ հուլիսին ինքը տեսել է, թե ինչպես է մի ճարտարապետ Սրբազանին փոխանցելու խնդրանքով «կամարաձև շինարարական գծագրություն» տալիս Աշոտին: Թե ի՞նչ կապ ունի 2012թ․ հուլիսին տեղի ունեցած այդ դեպքը 2013 թվականի հետ, պարզ չէ, բայց այն, որ նմանատիպ անհեթեթ փաստարկումներից հետո, լրատվամիջոցն այդ հարցազրույցը վերնագրում է «Կճոյանը թող սուտ չխոսի՛, թե Աշոտ Սուքիասյանի հետ միայն Նոր տարվա օրերին է շփվել՝ հեռախոսով»՝ վառ ապացույցն է այն իրողության, որ հասարակության ապատեղեկացումը հստակ գիտակցված է և իրագործվում է մամուլի կողմից ստեղծված և ժամանակի ընթացքում հասարակության մեջ արմատացած էմոցիոնալ կարծրատիպերը օգտագործելու և խորացնելու մեթոդով:

Այս երկու տարվա ընթացքում առաջ քաշվող հարցադրումները և փաստարկները հաճախ դուրս են բերվում համատեքստից, աղավաղվում և առավելապես հարմարեցվում հրապարակումների քննադատական, դեղնավուն բնույթին: Մեկ անգամ ևս կոչ ենք անում լայն հասարակությանը թույլ չտալ կառավարելի դարձնել սեփական ենթագիտակցությունը նեղ խմբային շահերը հետապնդողներին»:

Վերջին օրերին լրատվամիջոցներում տեղեկություն էր տարածվել, որ Կիպրոսի օֆշորային գոտում բացված ընկերություններից մեկը գրանցված է վարչապետ Տիգրան Սարգսյանի, Արարատյան հայրապետական թեմի առաջնորդական փոխանորդ Նավասարդ արքեպիսկոպոս Կճոյանի և գործարար Աշոտ Սուքիասյանի անունով: Վերջինս, սակայն, հայտարարել էր, որ առանց վարչապետի և արքեպիսկոպոսի թույլտվության նրանց անուններով ընկերություն է հիմնել: Սուքիասյանի նկատմամբ հարուցվել է քրեական գործ և հայտարարվել հետախուզում: Վարչապետ Տիգրան Սարգսյանը դիմել էր ՀՀ գլխավոր դատախազություն’ իր անունն այս կամ այն բիզնեսի հետ կապելու փորձերին իրավական գնահատական տալու և մեղավորներին պատժելու նպատակով: Արքեպիսկոպոսը լրատվամիջոցներով հերքել էր իրեն վերագրվող մեղադրանքները: