ԵՐԵՎԱՆ, 25 ՄԱՅԻՍԻ, Tert.am: Քաջարանի համայնքապետ Մանվել Փարամազյանն արձակուրդ է գնացել:
Այս մասին Քաջարանի համայնքապետարանում հայտնել են Tert.am-ի թղթակցին:
«Քաղաքապետն ուրբաթ օրը գրած դիմումի հիման վրա մեկնել է տարեկան հասանելիք արձակուրդ»,-հայտնել է Փարամազյանի տեղակալը:
Հիշեցենք, որ երեկ Կապանի ոստիկանության բաժին բերման էր ենթարկվել Քաջարանի համայնքապետի չորս մերձավոր, մեկն ազատ է արձակվել, մյուսները ձերբակալվել են: Ավելի ուշ Քննչական կոմիտեն հայտարարություն տարածեց, որ Քաջարանի բնակիչներ Գ․ Մ․-ի և նրա ընկերոջ՝ Կ․ Թ․-ի միջև տեղի ունեցած վեճի հանգամանքների պարզաբանման համար Քաջարան համայնքի ղեկավարի կանչով 2020թ. ապրիլի 26-ին՝ ժամը 20:00-ի սահմաններում, Քաջարանի Լեռնագործների փողոցում գտնվող, վերջինիս պատկանող բենզալցակայանի հետնամասում գտնվող չգործող նախկին ռեստորանի շինությունում հավաքվել են համայնքի ղեկավարը և շուրջ 20 հոգի, որտեղ տեղի է ունեցել ծեծկռտուք։
2020 թ․մայիսի 24-ին Խ․ Մ-ն, Մ․ Ս-ն և Լ․ Հ-ն ձերբակալվել են` ՀՀ քրեական օրենսգրքի 131-րդ հոդվածի 2-րդ մասի 1-ին կետով, իսկ Ա․Պ-ն՝ ՀՀ քրեական օրենսգրքի 268-րդ հոդվածի 3-րդ մասով նախատեսված հանցագործություններ կատարելու կասկածանքով։
Նախաքննությունը շարունակվում է:
