Համավարակի այս օրերին ոչ մի կանոն չի պահվում, պետք է խստացնել սահմանափակումները. Իշխան Սաղաթելյան

ԵՐԵՎԱՆ, 2 ՀՈՒՆԻՍԻ, Tert.am: Դեռևս մարտ ամսին նշում էինք, որ արտակարգ դրության ռեժիմը պետք է խստորեն պահպանել, որ այսօրվա իրավիճակին չհասնեինք, սակայն Կառավարության անհետևողական և ձևական գործողությունները երկիրը հասցրին մի վիճակի, որ հետո շատ դժվար է լինելու առանց մեծ կորուստների դուրս գալ ստեղծված իրավիճակից. Tert.am-ի հետ զրույցում ասաց ՀՅԴ Հայաստանի գերագույն մարմնի ներկայացուցիչ Իշխան Սաղաթելյանը:

«Ոչ մի համաճարակային կանոն չի պահվում, և այս անլուրջ վիճակի մեղավորը հենց Կառավարությունն է: Պետք է նախաձեռնել հետևողական քայլեր և´ համաճարակի տարածումը կանխարգելելու, և´ առողջապահական համակարգը կարգի բերելու համար, ինչպես նաև հիվանդներին արագ օգնություն ցուցաբերելու, հետագա մահերը կանխելու համար»,- ասաց նա:

Իշխան Սաղաթելյանը կարծում է, որ քաղաքացիների տեղորոշման մասին օրենքի ընդունումը քաղաքացիների նկատմամբ վերահսկողություն իրականացնելն է, ոչ թե առողջապահական հարցերը կանոնակարգելը, քանի որ այդ օրենքի ընդունումից հետո դրական տեղաշարժ չի նկատվել:

«Ակնհայտ է, որ իշխանությունը փորձում է վերահսկողական գործիքներն ավելացնել` հասարակության համար տոտալ վերահսկողություն ունենալու համար: Այսօր երկիրը լուրջ աղետի, առողջապահական լուրջ ճգնաժամի առաջ է կանգնած, ինչը կարճ ժամանակ հետո, նաև ֆինանսատնտեսական ոլորտում կանդրադառնա, սակայն իշխանություններն իրենց գործը և անելիքը թողել և ընկել են գույքահարկի մասին օրենքի, քաղաքացիների մասին հայտարարագրման, այսինքն՝ առաջնահերթության կարևորության ու նպատակահարմարության հարցը թողել են, այլ՝ երկրորդական հարցրերով են զբաղվում: Ականատես ենք լինում հերթական ոչ ադեկվատ գործողություններին»,- ասաց նա:

Իշխան Սաղաթելյանը, անդրադառնալով գույքահարկի բարձրացման վերաբերյալ որոշմանը, նշեց, որ միշտ ծրագրային առաջնահերթություն է եղել՝ շատ վաստակողին շատ հարկել, իսկ քիչ վաստակողին` քիչ:

«Այն, ինչ իրենք ներկայացնում են «Գույքահարկի մասին» օրենքի հետ կապված, այս իմաստով խայտառակություն է, որովհետև մարդկանց գոտևորման խնդիր է առաջանալու այսինք՝ հարուստները պետք է ապրեն կենտրոնում, քանի որ գույքահարկը բարձր է լինելու, իսկ ովքեր չունեն այդ կարողությունները, տեղափոխվեն ծայրամաս»,– ասաց նա:

«Եթե մարդիկ Կենտրոնում պապական տներ են ստացել և այսօր չունեն միջոցներ գույքահարկը մուծելու, հիմա ի՞նչ է, ստիպված պետք է վաճառե՞ն: Ինձ համար ակնհայտ է, որ թե´ տեղորոշման մասին օրենքը, թե´ ֆիզիկական անձանց ունեցվածքի, գույքագրման և թե´ գույքահարկի որոշումը ունի նպատակ՝ ամրապնդել իշխանությունը հասարակության տարբեր հատվածերի նկատմամբ և իրականացնել վերահսկողություն»,- ընդգծեց նա: