ԵՐԵՎԱՆ, ԴԵԿՏԵՄԲԵՐԻ 7, Times․am: Այսօր Շրջակա միջավայրի նախարար Ռոմանոս Պետրոսյանը հայտարարեց, որ իրենք բողոքարկելու են ընտրության արդյունքները և դիմելու են Կենտրոնական ընտրական հանձնաժողով՝ Աբովյան համայնքի 25 խոշոր ընտրատեղամասերում վերահաշվարկ կատարելու համար։
«Ժամը 14-ից սկսել է վերահաշվարկ կատարվել 4 ընտրատեղամասերում։ 4 ընտրատեղամասից երկուսում որևէ փոփոխություն չի արձանագրվել, մեկ՝ 29/35 ընտրատեղամասում «Բարգավաճ Հայաստան» կուսակցությունից 2 քվե վերահաշվարկի արդյունքում դարձել է անվավեր, «Քաղաքացիական պայմանագիր» կուսակցությունից 3 քվե դարձել է անվավեր», – Aysor.am-ի թղթակցի հետ զրույցում ասաց ԲՀԿ փոխնախագահ Շաքե Իսայանը։
Նա ասաց, որ 29/28 ընտրատեղամասում, որը գտնվում է Առինջ համայնքում, բոլոր կուսակցությունների քվեները պահպանվել են։
Միայն «Բարգավաճ Հայաստան» կուսակցության ձայներն ավելացել են 7-ով, 396-ից դարձել է 403, քանի որ անվավեր քվեաթերթիկների մեջ տեղ են գտել ակնհայտ վավեր քվեաթերթիկներ։ Այդ ընտրատեղասում հանձնաժողովի նախագահը ՔՊ-ից էր։
Քվեաթերթիկների հաշվարկը շարունակվելու է ևս երեք օր։
«Վերահաշվարկի համար 25 ընտրատեղամասերն ընտրվել են «Քաղաքացիական պայմանագիր» կուսակցությունից։ Ցավոք, ժամկետները սպառված են, որպեսզի դիմենք և բողոքարկենք բոլոր տեղամասերի արդյունքերը։ Չենք բացառում, որ հետագայում դատական պրոցեսով նման հայտ ներկայացնենք։ Հետաքրքիր զուգադիպությամբ ընտրված են այն տեղամասերը, որտեղ ԲՀԿ-ն առավել շատ քվե է ստացել, քան ՔՊ-ն։ Նույնիսկ այս դեպքում ապացուցվեց, որ «Բարգավաճ Հայաստանի» օգտին է վերահաշվարկը», – ասաց Շաքե Իսայանը։
Նա համոզմունք հայտնեց, որ 41 ընտրատեղամասերի վերահաշվարկի դեպքում ԲՀԿ-ի ձայները կավելանան։
