ԵՐԵՎԱՆ, ՀՈՒՆՎԱՐԻ 30, Times․am: Ռուսաստանի կողմից ցանկացած հարձակում Ուկրաինայի տարածքային ամբողջականության վրա, կունենա հսկայական հետևանքներ։ Այս մասին հայտարարել է Ֆրանսիայի արտաքին գործերի նախարար Ժան Իվ Լը Դրիանը, Journal du dimanche-ին տված հարցազրույցում։
Ուկրաինա ներխուժելու դեպքում, Ֆրանսիայի ԱԳ նախարարը Ռուսաստանին սպառնացել է լուրջ պատժամիջոցներով և համաձայնվել Գերմանիայի ԱԳ նախարար Անալեն Բերբոկի տեսակետի հետ։ «Իմ գերմանացի գործընկերն ասել է, ոչ մի քայլ առաջ»,-նշել է Լը Դրիանը։
Դիվանագետը շեշտել է, որ տվյալ իրավիճակում Ֆրանսիան առաջնորդվում է երեք սկզբունքներով․ հաստատակամություն պատժամիջոցների հարցում, համաձայնություն՝ Ուկրաինային և հակվածություն՝ բանակցություններին։
Միաժամանակ նա հավելել է, որ ֆրանսիական իշխանությունները տեղյակ չեն, թե ինչպիսի որոշում է ընդունել ՌԴ նախագահ Վլադիմիր Պուտինը։ Ֆրանսիայի ԱԳ նախարարի խոսքերով, Ռուսաստանի առաջնորդը ստիպված է ընտրություն կատարել բանակցությունների և առճակատման միջև։
Ավելի վաղ, ինչպես փոխանցում է ТАСС գործակալությունը, Ֆրանսիայի ԱԳ նախարարությունը հայտարարել էր, որ ԵՄ-ն պատրաստ է պատժամիջոցները կիրառել «Հյուսիսային հոսք 2» (Северный поток-2) գազային խողովակաշարի նախագծի դեմ, եթե ռուսական կողմը որոշի ներխուժել Ուկրաինա։ Նա նշել էր, որ դա կլինի հակաքայլերից մեկը, որը միտված է Ռուսաստանին ապացուցելու, որ ռազմական կոնֆլիկտը Ուկրաինայի դեմ, նրան կհանգեցնի լուրջ հետևանքների։
