Բժշկական գիտությունների պրոֆեսոր, ակնաբույժ Մանուկ Մանուկյանը աշխարհում նախադեպը չունեցող քիմիական այրվածքների համար նախատեսված քսուկ է հայտնագործել: «Արմենպրես»-ի փոխանցմամբ’ սեպտեմբերի 14-ին հրավիրված ասուլիսում Մանուկյանը նշեց, որ գյուտի բացառիկությունը հաստատվել է արդեն Մոսկվայի’ Ռուսաստանի ռազմաբժշկական ակադեմիայում:
«Քսուկի հիմքում մոնոեթալոնամինն է (monoetalonamin), որը երկու ամսում հնարավորություն է ընձեռում լրիվ վերականգնել վնասված հյուսվածքները»,- վստահեցրեց պրոֆեսորը:
Նրա խոսքով’ բոլոր անհրաժեշտ հետազոտություններն անցնելուց եւ աշխարհի մի շարք երկրներում իր գյուտի մասին զեկուցումներ կարդալուց հետո այն գրավել է հանրության ուշադրությունը: «Քիմիական այրվածքների բուժման մեկ այլ միջոց չկա, սա համարվում է միակը»,- նշեց ակնաբույժը: Նա պատմեց, որ իր գյուտի թեմայով թեզը պաշտպանելուց հետո 1983 թվականից սկսած հաջողությամբ կիրառում է իր գյուտը ճագարների մաշկի վրա:
Նրա գնահատմամբ’ իր հայտնագործած քսուկն էապես կօգներ նաեւ Սիրիայի պատերազմում տուժածներն:
Մանուկյանը իր գյուտն արտոնելու եւ նախակլինիկականից հետո կլինիկական փորձարկումներ անցկացնելու թույլտվություն ստանալու համար նամակով դիմել է մի շարք գերատեսչությունների եւ ՀՀ նախագահին:
ՀԽ ֆինանսատնտեսական եւ բյուջետային հարցերի հանձնաժողովի ինովացիոն հարցերի ենթահանձնաժողովի նախագահ Իրինա Հովակիմյանն էլ նշեց, որ գիտության ոլորտին վերաբերող վերջնական որոշումները կայացնում են հանձնաժողովի անդամների եւ համապատասխան մասնագետների կողմից:
«Մենք դիմել ենք իրավասու կառուցներին, Առողջապահության նախարարությանը, քանի որ լիցենզավորման համար անհրաժեշտ են ֆինանսական միջոցներ»,- ասաց Հովակիմյանը:
Բանախոսները շեշտեցին, որ կլինիկական փորձարկման համար անհրաժեշտ է 250-300 հազար դոլար:
