«Փոխգործակցություն 2013» Հավաքական անվտանգության պայմանագրի կազմակերպության արագ արձագանքման հավաքական ուժերի համատեղ զորավարժությանը Հայաստանը կմասնակցի 50 սպաներով եւ զինծառայողներով: Այս մասին «Արմենպրես»-ի հետ զրույցում տեղեկացրեց ՀՀ ՊՆ մամուլի խոսնակ Արծրուն Հովհաննիսյանը: «Զորավարժությունները կանցկացվեն սեպտեմբերի 18-27-ը՝ Բելառուսում»,- հայտնեց նա՝ ընդգծելով, որ հայկական ստորաբաժանումները բեր ված են համապատասխան մարտական պատրաստվածության եւ պատրաստ են զորավարժություններին:
Արծրուն Հովհաննիսյանը հավելեց, որ չի կարող հստակ ասել, թե ինչ վարժություններ են սպասվում զորավարժությունների ընթացքում: «Մեր զինծառայողները պատրաստ են ցանկացած վարժության: Դժվար կլինի հստակ ասել, թե ինչ է այնտեղ սպասվում, քանի որ կազմակերպիչը Բելառուսն է: Բոլոր հրահանգները կտրվեն տեղում»,- նշեց նա:
Նմանատիպ զորավարժություններին մասնակցելը բարձրացնում է ցանկացած բանակի մարտունակությունը: Արծրուն Հովհաննիսյանը նշեց, որ Հայաստանը միշտ պատրաստ է և կարևորում է զորավարժություններին մասնակցելը: «Մենք ամեն տարի մասնակցում ենք ամենատարբեր զորավարժությունների եւ դա շարունակական է լինելու»,- պարզաբանեց նա:
«Փոխգործակցություն 2013» ՀԱՊԿ արագ արձագանքման հավաքական ուժերի համատեղ զորավարժությունը կանցկացվի Բելառուսի Հանրապետությունում: Զորավարժությանը կմասնակցեն Հայաստանի, Բելառուսի, Ռուսաստանի, Ղազախստանի, Ղրղզստանի եւ Տաջիկստանի զորախմբերը:
«Փոխգործակցություն 2012»-ն անցյալ տարի անցկացվեց Հայաստանում։ Միջոցառմանը ներկա են եղել ՀՀ նախագահ, ՀՀ ԶՈւ գերագույն գլխավոր հրամանատար Սերժ Սարգսյանը, պաշտպանության նախարար Սեյրան Օհանյանը, ՀԱՊԿ միացյալ շտաբի համատեղ օպերատիվ և մարտական պատրաստության վարչության ուղղության պետ, գեներալ-մայոր Վլադիմիր Ուստինովը և այլ բարձրաստիճան զինվորականներ։
