«Չելսիի» գլխավոր մարզիչ Ժոզե Մոուրինյոն կարծում է, որ իր թիմի վերջին երկու պարտությունները՝ Անգլիայի առաջնությունում «Էվերթոնից», ապա Չեմպիոնների լիգայում՝ «Բազելից», պայմանավորված են խաղաոճի փոփոխությամբ:
-Ես ֆուտբոլում եմ արդեն բավականին երկար ժամանակ և սովորել եմ չզարմանալ տարբեր դատողություններից և քննադատություններից: Մարզչի համար ամենահեշտ տարբերակը թիմը գլխավորելը և այնտեղ ոչինչ չփոխելն է: Հասկանում եմ՝ եթե թիմը լավ արդյունք չի ցուցադրում, ապա պատասխանատուն ես եմ: Սակայն ես պետք է շարժվեմ այն ուղղությամբ, որն ի սկզբանե սահմանել եմ:
Մենք ընդամենը մեկ պարտություն ենք կրել Պրեմիեր լիգայում և ևս մեկը Չեմպիոնների լիգայում: Դա չի նշանակում, թե դուրս ենք մնացել Չեմպիոնների լիգայից կամ այլևս չենք հավակնում հաղթել Անգլիայի առաջնությունում: Տիտղոսի մյուս հավակնորդները, բացի «Լիվերպուլից», ևս պարտություն են կրել,-ասել է Մոուրինյոն լոնդոնյան ակումբի պաշտոնական կայքին տված հարցազրույցում:
