Մադրիդյան լրատվամիջոցները մատնանշում են այն հանգամանքը, որ մրցավար Այսա Գամեսը, ով երեկ «Ատլետիկի» դեմ խաղում Կրիշտիանու Ռոնալդուին հեռացնելու վիճելի որոշում կայացրեց, առաջին անգամը չէ, որ նման որոշումներով բացասաբար է ազդում արքայական թիմի խաղերի ելքերի վրա:
Անդրադառնալով այս թեմային՝ «Defensacentral.com»-ը նշել է, որ Այսա Գամեսը Մադրիդի «Ռեալի» մասնակցությամբ 13 հանդիպում է սպասարկել, որից 8-ում «Ռեալը» հաղթել է, 3-ն ավարտվել են ոչ-ոքի և 2-ում թիմը պարտվել է: Համեմատության համար լրատվամիջոցը նշել է, որ Գամեսը «Բարսելոնայի» մասնակցությամբ դատել է 14 խաղ, որից 13-ում թիմը հաղթել է և 1 խաղ ավարտվել է ոչ-ոքի:
Կատալոնական լրատվամիջոցներից «Mundo deportivo»-ն նույնպես անդրադարձել է Կրիշտիանու Ռոնալդուի հեռացմանը՝ նշելով, որ սա առաջին անգամը չէ, որ մադրիդյան թիմի մասնակցությամբ հանդիպման ընթացքում վալենսիացին այնպիսի որոշում է կայացնում, որը բազմաթիվ վիճաբանությունների առիթ է դառնում:
