ԱՄՆ-ում նոր պատժամիջոցներ են պահանջում Թուրքիայի դեմ. Միջազգային լրահոս
Նմանատիպ
Տարածաշրջանային և միջազգային կարևոր զարգացումները Times.am-ի դիտակետից։ Ի՞նչ է տեղի ունենում Հարավային Կովկասում և հարակից տարածաշրջաններում։ Կարդացեք միջազգային ամենակարևոր լուրերը մեր ամփոփ տեղեկագրում։
Կիևում այսօր կմեկնարկի ԵՄ-Ուկրաինա գագաթնաժողովը
Եվրահանձնաժողովի նախագահ Ուրսուլա ֆոն դեր Լայենը, ԵՄ արտաքին քաղաքականության պատասխանատու Ժոսեպ Բորելը և 14 կարևոր եվրոպական հանձնակատարներ նախօրեին ժամանել են Կիև՝ այսօր կայանալիք ԵՄ-Ուկրաինա գագաթնաժողովից առաջ Ուկրաինայի կառավարության հետ համատեղ հանդիպման համար։
«Մենք ժամանել ենք Կիև՝ բոլոր ուկրաինացիներին ԵՄ աջակցության ամենաուժեղ ազդանշանը հաղորդելու համար», – գրել է Բորելը Twitter-ում՝ հստակեցնելով, որ ԵՄ օգնությունը Կիևին հակամարտության սկզբից ի վեր կազմում է 50 միլիարդ եվրո։
Ինչպես տեղեկացնում են եվրոպական աղբյուրենրը, ԵՄ-Ուկրաինա՝ ասյօր կայանալիք գագաթնաժողովի ընթացքում քննարկվելու է ԵՄ-ին Ուկրաինայի անդամակցության նախապատրաստական աշխատանքները։
ԱՄՆ-ում նոր պատժամիջոցներ են պահանջում Թուրքիայի դեմ
ԱՄՆ Հանրապետական և Դեմոկրատական կուսակցությունը ներկայացնող մի շարք սենատորներ պահանջել են նախագահ Բայդենից հետաձգել Թուրքիային F-16 կործանիչներ վաճառելու գործընթացը։ Երկրի նախագահին ուղղված նամակում սենատորները նշում են, որ Թուրքիային զինելու այդ գործարքը կարող է տեղի ունենալ միայն Շվեդիայի և Ֆինլանդիայի՝ ՆԱՏՕ-ին անդամակցելուց հետո։
Նշենք, որ Թուրքիայի իշխանությունները քանի ամիս շարունակ արգելափակում են Շվեդիայի և Ֆինլանդիայի անդամակցությունը ՆԱՏՕ-ին։ Պաշտոնական Անկարան մեղադրում է երկու այդ երկրներին քրդերին աջակցելու մեջ։ Թուրքական կողմը Շվեդիայում և Ֆինլանդիայում ապաստան գտած քրդերի մի ցուցակ է կազմել՝ նշելով, որ ցուցակում ներառված մարդիկ ահաբեկիչներ են և որ նրանք պետք է արտահանձնվեն Թուրքիա։
Եթե Անկարան չհաստատի Ֆինլանդիայի և Շվեդիայի ՆԱՏՕ անդամակցությունը, ապա տարբեր պատժամիջոցներ կկիրառվեն Թուրքիայի նկատմամբ։ Այ մասին Al-Monitor-ին հայտնել է Դեմոկրատական կուսակցության և արտաքին հարաբերությունների կոմիտեի անդամ Քրիս Վան Հոլենը։
Ավելի վաղ ԱՄՆ Սենատի արտաքին հարաբերությունների հանձնաժողովի նախագահ Բոբ Մենենդեսն էր խոսել Թուրքիային «F-16»-երի վաճառքը չհաստատելու մասին։
Թուրքիան՝ ահաբեկչական սպառնալիքի տակ
Մի շարք երկրներ փակել են Ստամբուլում գործող իրենց հյուպատոսարանները՝ նշելով, որ երկիրը գտնվում է ահաբեկչական գործողույունների սպառնալիքի տակ։ Նման սպառնալիքի մասին տեղեկություն առաջին անգամ հրապարակել է Թուրքիայիում ԱՄՆ դեսպանատունը՝ հորդորելով իր քաղաքացիներին խուսափել մարդաշատ վայրերում հավաքվելուց, ինչպես նաև տուրիստական կենտրոններ այցելելուց։ Ի պատասխան ԱՄՆ այդ զգուշացումների, թուրքական կողմն էլ իր քաղաքացիներին է զգուշացրել ԱՄՆ այցելելուց։ Թուրքիայի ներքին գործերի նախարար Սուլեյման Սոյլուն հինգշաբթի օրը մի շարք եվրոպական երկրների կողմից Ստամբուլում իրենց հյուպատոսությունների փակումը ահաբեկչական հարձակումների սպառնալիքի մասին ԱՄՆ-ի հայտարարությունների ֆոնին անվանել է «հոգեբանական պատերազմ»՝ երկրի դեմ։
Նախօրեին ինը երկրների, այդ թվում՝ Ստամբուլում իրենց հյուպատոսությունները փակած դեսպանները կանչվել են Թուրքիայի ԱԳՆ։ Ավելի վաղ Ստամբուլում Շվեդիայի, Նիդեռլանդների, Մեծ Բրիտանիայի, Ֆրանսիայի, Շվեյցարիայի և Գերմանիայի գլխավոր հյուպատոսությունները հայտնել էին, որ դադարեցրել են այցելուներ ընդունել քաղաքի կենտրոնում ահաբեկչական հարձակումների սպառնալիքի պատճառով։
Ռուսաստանի Դաշնության հյուպատոսությունը հայտնել է, որ այն շարունակում է աշխատել սովորական ռեժիմով։
Եվրասիական միջկառավարական խորհրդի նիստ
Ղազախստանի Ալմաթի քաղաքում նախօրեին տեղի է ունեցել Եվրասիական միջկառավարական խորհրդի նեղ կազմով նիստը: Եվրասիական տնտեսական միության երկրների վարչապետները քննարկել են եվրասիական ինտեգրացիային առնչվող արդիական մի շարք հարցեր: Մասնավորապես, անդրադարձ է կատարվել ԵԱՏՄ ներքին շուկայի գործունեությանը, արդյունաբերական կոոպերացիայի ֆինանսավորմանը, ագրոարդյունաբերական համալիրի զարգացմանը, էներգետիկայի ոլորտում համագործակցությանը։
Կարևորվել է թվային օրակարգի իրականացումը, մասնավորապես՝ միության ինտեգրացիոն տեղեկատվական համակարգի կատարելագործումը:
Միջկառավարական խորհրդի ընդլայնված կազմով նիստը տեղի է ունենալու փետրվարի 3-ին:
Հետևեք մեզ նաև Telegram-ում