Թուրքիան ապրիլի վերջին TEKNOFEST-2023 ավիացիոն և տիեզերական տեխնոլոգիաների փառատոնի ժամանակ կներկայացնի աշխարհում առաջին անօդաչու թռչող սարքը, որը կարող է օդ բարձրանալ և վայրէջք կատարել կարճ թռիչքուղով նավերի վրա։

Այս մասին հայտնում է Anadolu գործակալությունը։ Bayraktar TB3 անօդաչու թռչող սարքը կներկայացնի թուրքական Baykar ընկերությունը։ Միջոցառումը տեղի կունենա ապրիլի 27-ից մայիսի 1-ը, Ստամբուլի Աթաթուրքի անվան օդանավակայանում։

Աղբյուրի փոխանցմամբ՝ Bayraktar TB3-ի գործողությունները հնարավոր կլինի վերահսկել շատ մեծ հեռավորությունների վրա՝ ինչպես հետախուզական, այնպես էլ դիտորդական ու հարվածային նպատակներով։ Նշվում է, որ իր ֆունկցիոնալության շնորհիվ նոր անօդաչու թռչող սարքը շոշափելի ներդրում կլինի Թուրքիայի ռազմական ներուժի ամրապնդման գործում։