«19 երկիր ցանկություն է հայտնել միանալ BRICS խմբին»,- հայտնում է Bloomberg-ը։
BRICS-ը հինգ երկրից կազմված խումբ է, որի անդամ են Բրազիլիան, Ռուսաստանը, Հնդկաստանը, Չինաստանը և Հարավաֆրիկյան Հանրապետությունը։ Այս երկրները միմյանց մինջև տնտեսական համագործակցությամբ ցանկանում են փոխել համաշխարհային տնտեսության կառուցվածքը, առաջին հերթին՝ «հեռանալով» ԱՄՆ դոլարից։
Այժմ BRICS-ին նոր երկրներ են ցանկանում միանալ, որոնց անդամակցումը կարող է նոր շունչ հաղորդել աշխարհի տնտեսական վերաձևավորմանը։
«Տասներեք երկիր պաշտոնապես միանալու հայտ է ներկայացրել, ևս վեցը՝ ոչ պաշտոնական: Մենք ամեն օր մասնակցության հայտեր ենք ստանում», – հայտարարել է BRICS-ում Հարավային Աֆրիկայի դեսպան Անիլ Սուկլալը:
Ավելի վաղ Մոսկվայում Հարավաֆրիկյան Հանրապետության դեսպան Մզուվուկիլե Մակետուկան հայտարարել էր, որ BRICS-ին անդամակցության համար պաշտոնապես հայտ են ներկայացրել Արգենտինան, Իրանը, Ալժիրը, Եգիպտոսը, Բահրեյնը, Սաուդյան Արաբիան և Արաբական Միացյալ Էմիրությունները։
BRICS-ն անդամ պետությունների լատինատառ անվանումների հապավումն է՝ կազմված առաջին տառերից (Brazil, Russia, India, China, South Africa):
