Անցած գիշեր ուկրաինական անօդաչու թռչող սարքերը փորձել են հարվածել Կրեմլում ՌԴ նախագահի նստավայրին։ ՌԴ նախագահ Վլադիմիր Պուտինը չի տուժել և շարունակում է աշխատել սովորական ռեժիմով։
Այս մասին չորեքշաբթի հայտնել է Կրեմլի մամուլի ծառայությունը։
«Ահաբեկչության հետևանքով ՌԴ նախագահը չի տուժել, նրա աշխատանքային գրաֆիկը չի փոխվել և շարունակվում է սովորական ռեժիմով»,- ասվում է հաղորդագրության մեջ։
ՌԴ նախագահի մամուլի ծառայությունը հավելել է, որ ռուսական ռազմական և հատուկ ծառայությունները վնասազերծել են երկու գրոհող անօդաչու թռչող սարքեր։ Ուկրաինական հարձակման հետևանքով զոհեր և վիրավորներ չկան։
Կրեմլը Կիևի հարձակման փորձը համարել է ծրագրված ահաբեկչություն և Ռուսաստանի Դաշնության Նախագահի դեմ մահափորձ Հաղթանակի օրվա նախօրեին։ Նշվում է, որ Ռուսաստանը իրեն իրավունք է վերապահում պատասխանել Կրեմլի վրա հարվածի փորձին, «այն ժամանակ և այն վայրում, որտեղ որ հարմար կգտնի»:
