Հունգարիայի վարչապետը կարծում է, որ Ուկրաինային չի հաջողվի հաղթել պատերազմում

Ուկրաինան չի կարողանա հաղթել Ռուսաստանի հետ հակամարտությունը, ՆԱՏՕ-ն պատրաստ չէ իր զորքերն ուղարկել այնտեղ, և այդ պատճառով իրավիճակը պետք է հնարավորինս շուտ կարգավորվի խաղաղ ճանապարհով։

Այս մասին հայտարարել է Հունգարիայի վարչապետ Վիկտոր Օրբանը՝ Քաթարի տնտեսական ֆորումի հանրային քննարկման ժամանակ։

Օրբանի ելույթը Դոհայում վերածվել է ֆորումի վարողի հետ հարցազրույցի և հեռարձակվել Հունգարիայի կառավարության ֆեյսբուքյան էջում: Պատասխանելով ուկրաինական հակամարտության վերաբերյալ հարցերին՝ վարչապետը հիշեցրել է, որ Հունգարիան հենց սկզբից հանդես է եկել խաղաղ կարգավորման օգտին և հայտարարել է կրակի անհապաղ դադարեցման անհրաժեշտության մասին։

«Մենք պետք է մտածենք, թե ինչպես փրկել մարդկանց կյանքը, սա է իմ դիրքորոշումը»,- ասել է Օրբանը։