Չինաստանը պատժամիջոցներ է սահմանում ամերիկյան որոշ ընկերությունների նկատմամբ

Չինաստանի իշխանությունները պատասխան պատժամիջոցներ կսահմանեն ամերիկյան հինգ ընկերության նկատմամբ՝ Թայվանի վարչակազմին ԱՄՆ կողմից զենքի մատակարարմամբ և չինական ձեռնարկությունների և անհատների նկատմամբ Վաշինգտոնի սահմանափակումներով պայմանավորված: Այս մասին հայտնում է Չինաստանի ԱԳՆ-ն։

«Միացյալ Նահանգները բացահայտորեն խախտում է «մեկ Չինաստան» սկզբունքը՝ զենք վաճառելով Թայվանին և տարբեր պատրվակներով ապօրինի միակողմանի պատժամիջոցներ սահմանելով չինական ձեռնարկությունների և անհատների դեմ»,- ասվում է հայտարարության մեջ։

Այսպիսով, Չինաստանի Ժողովրդական Հանրապետության արտաքին պատժամիջոցներին հակազդելու մասին օրենքին համապատասխան, Չինաստանը որոշել է պատժամիջոցներ կիրառել BAE Systems Land and Armament, Alliant Techsystems Operation, AeroVironment, ViaSat և Data Link Solutions ընկերությունների դեմ։

Սահմանված պատժամիջոցները նախատեսում են ակտիվների սառեցում, ներառյալ՝ չինական տարածքում այդ ընկերությունների անշարժ գույքը։

«Կազմակերպություններին և անհատներին արգելվում է գործարքներ կնքել նրանց հետ, համագործակցել կամ այլ տեսակի փոխգործակցություն իրականացնել», – պարզաբանում է ՉԺՀ դիվանագիտական կորպուսը և շեշտում՝ ԱՄՆ-ն իր գործողություններով խաթարում է ինքնիշխանությունը, ոտնահարում Չինաստանի անվտանգության շահերը, չինական ձեռնարկությունների և անհատների օրինական իրավունքները, լուրջ վնաս հասցնում Թայվանի նեղուցում խաղաղությանը և կայունությանը: