Իրանում մեկնարկել են խորհրդարանի և փորձագետների խորհրդի ընտրությունները

Այսօր՝ մարտի 1-ին, Իրանում մեկնարկել են խորհրդարանի 12-րդ և փորձագետների խորհրդի 6-րդ գումարման ընտրությունները։ Առավոտյան ժամը 8-ին երկրի ներքին գործերի նախարար Ահմեդ Վահիդիի հրամանով բացվել են բոլոր ընտրատեղամասերը։ Այս մասին հայտնում է Irna գործակալությունը։

Իրանում ընտրական ձայնի իրավունք ունի շուրջ 61 միլիոն մարդ, որոնք ավելի քան 15 000 թեկնածուներից օրենսդիր մարմնի անդամ են ընտրելու 290 հոգու։ Իրանի խորհրդարանն ընտրվում է չորս տարի ժամկետով։

Նշենք նաև, որ Իրանի խորհրդարանում կրոնական փոքրամասնություններն ունեն հինգ տեղ, դրանցից 2–ը պատկանում է հայկական համայնքին։

Միաժամանակ անցկացվող մյուս ընտրություններում մասնակիցները քվեարկում են Փորձագետների խորհրդի` խորհրդակցական մարմնի 88 անդամների օգտին։ Խորհուրդն ընտրվում է ութ տարի ժամկետով, և նրան է պատկանում Իրանի Իսլամական Հանրապետության հոգևոր առաջնորդ ընտրելու իրավունքը:

Իսլամական հեղափոխության առաջնորդ Սեյեդ Ալի Խամենեին քվեարկության առաջին իսկ րոպեներին քվեարկել է Թեհրանի ընտրատեղամասերից մեկում, փոխանցում է գործակալությունը։