Միգրացիոն այս աննախադեպ հոսքը Եվրոպա ոչ թե աղետալի է, այլ սարսափելի աղետալի. Սորբոնի համալսարանի քաղաքագիտության դոկտոր
Նմանատիպ
Միգրացիայի ներկայիս ալիքն աննախադեպ է պատմության մեջ: Այն նույնիսկ գերազանցում է երկրորդ համաշխարհային պատերազմի տարիների ալիքին: «Sputnik-Արմենիա» ռադիոկայանի հետ զրույցում նման տեսակետ է հայտնել քաղաքագետ, Սորբոնի համալսարանի քաղաքագիտության դոկտոր Հայկ Մարտիրոյանը: Նրա խոսքով՝ այն, ինչ կատարվում է այսօր Եվրոպայում, կարելի է բնորոշել մի քանի բառով՝ արևմտյան քաղաքակրթության վախճան: Քաղաքագետը միգրացիոն այս աննախադեպ հոսքը համարում է ոչ թե աղետալի, այլ սարսափելի աղետալի:
«Ֆրանսիայում միգրանտների հոսքը սկսվեց նախագահ Միտերանի օրոք, որը հիմք դրեց ֆրանսիական հասարակության փոփոխությանը: Սակայն այն, ինչ հիմա է տեղի ունենում, աննախադեպ է, և ֆրանսիական հասարակությունը, ցավոք, շատ ծանր կվճարի առաջիկայում: Շատ ավելի ծանր է վիճակը Գերմանիայում, որտեղ անշուշտ կային թուրքեր, որոնք բերվել էին Թուրքիայից, որպես դաշնակից պետության քաղաքացիներ, երկրորդ աշխարհամարտից հետո երկիրը վերակառուցելու համար: Եւ կյանքը ցույց տվեց, որ այդ թուրքերը չինտեգրվեցին գերմանական հասարակությունը, թեև Թուրքիան ավելի աշխարհիկ պետություն էր, քան այն արաբական երկրները, որտեղից այսօր ահռելի ներհոսք կա Գերմանիա: Անշուշտ, սա կհանգեցնի Գերմանիայի մշակութային և քաղաքակրթական կործանմանը»,-հոռետեսական կանխատեսում է արել բանախոսը:
Սարսափելի վիճակ է նաև Շվեդիայում, Դանիայում: Քաղաքագետը համոզված է, որ միգրացիոն այս հոսքը շատ ծանր կլինի նաեւ շվեդների համար, և նրանք արդեն զգում են դրա տնտեսական հետևանքները:
Հայկ Մարտիրոսյանն ուշադրություն է հրավիրում նաեւ այն հանգամանքին, որ Մերձավոր Արեւելքից եկող փախստականները՝ ձուլվող, ինտեգրվող չեն, ավելին՝ դրանց թվում կան նաեւ վտանգավոր տարրեր: «Նախ պետք է հասկանանք, թե ովքեր են սիրիացիները, որոնց այդքան խղճում են արևմտաեվրոպացիները: Ա՛յո, անշուշտ, կան սիրիացիներ, ալևիներ, շիաներ, սակայն միգրանտների գերակշիռ մասը՝ սունիներն են, որոնք սիրիական ընդդիմության համակիրներ են և, ընդհանրապես, դուրս են գալիս երկրից՝ նոր, առավել բարեկեցիկ երկրներ մուտք գործելու համար: Եվրոպայում նրանք չեն ինտեգրվելու, այլ փորձելու են իրենց ինտեգրել Եվրոպան: Սա ոչ թե իսլամաֆոբիա է, կանխատրամադրված մոտեցում է, այլ օբյեկտիվ փաստերի և իրականության քննություն է»,-վստահեցրել է նա:
Քաղաքագիտության դոկտորի ներկայացմամբ՝ այսօր կա խորքային տարբերություն՝ միգրանտի և փախստականի միջեւ: Վերջինս բռնագաղթածն է, մինչդեռ միգրանտը՝տնտեսական, գուցե, նաև կրոնական ներգաղթյալ է: «Ես չեմ ուզում ասել փախստականներ, որովհետև անձամբ չեմ համարում այդ զանգվածի մեծամասնությանը փախստական: Անշուշտ կան փախստականներ, բայց դրանք փոքրամասնություն են»,-համոզված է բանախոսը:
Եվրոպան արդեն «ֆորս մաժորային» իրավիճակում է և արդեն հասկանում է, որ չի կարող ընդունել անթիվ-անհամար միգրանտների: Մարտիրոսյանը նկատում է՝ հակառակ պարագայում այն կդառնա Սոմալիի կամ Սիրիայի գավառ: Հետեւաբար՝ ի՞նչ անել: Հայկ Մարտիրոսյանի պատկերացմամբ՝ այն պետք է փակի սահմանները և պահի միայն իրական փախստականներին, իսկ մնացյալին վերադարձնի ելման երկրներ: «Իհարկե, այս պահի դրությամբ դա գրեթե անհնար է: Սակայն, հակառակ պարագայում Եվրոպան, միանշանակորեն, գործում է ինքնասպանություն և հեռանկարում՝ 20-30 տարի հետո, չի կարելի բացառել նաև սարսափելի սցենարներ, որոնք այսօր կարող են ֆանտաստիկ թվալ»,-հավաստիացրել է Սորբոնի համալսարանի քաղաքագիտության դոկտորը:
Հետևեք մեզ նաև Telegram-ում