Ընդհանուր ներդրումներն աճել են, ԵՏՄ-ին անդամակցումից էլ թռիչքաձև արդյունք սպասելու համար դեռ վաղ է. Կարեն Ճշմարիտյան
Նմանատիպ
Հայաստանում ընդհանուր ներդրումներն աճել են 4.7 միլիարդ դրամով՝ ընթացիկ տարվա վեց ամսվա տվյալներով: Այս մասին Times.am-ի հետ զրույցում ասաց ՀՀ էկոնոմիկայի նախարար Կարեն Ճշմարիտյանը:
-Վերջերս Հայաստանում ԵՄ պատվիրակության ղեկավար Պյոտր Սվիտալսկին հայտարարեց, թե Հայաստանում կատարվող ուղղակի ներդրումների մակարդակը պատրաստ են մեծացնել, բայց օտարերկրյա ներդրողները պետք է իմանան, թե ինչի է ուզում Հայաստանը հասնել 10-15 տարուց: Հիմա՝ մենք գիտե՞նք, թե ինչի ենք հասնելու 10-ը տարի հետո: Ի դեպ, ասում են, որ ուղղակի նեդրումներն են նվազել:
-Տեսլական, իհարկե, ունենք, որը նոր իրողությունների պարագայում պիտի նորացվի: Իսկ ուղղակի ներդրումներն ընդհանուր ներդրումների մեջ ընդամենը մի տարր են: Որն է ընդհանուր և ուղղակի նեդրումների տարբերությունը՝ ուղղակի ներդրումները կոնկրետ կանոնադրական կապիտալի մեջ ընդգրկված ներդրումներն են, իսկ ընդհանուրը՝ պորտֆելային, փոխառություններ, այսինքն՝ Հայաստանի Հանրապետություն կատարված ընդհանուր օտարերկրյա ներդրումներն են: Դրա մեջ մի կոմպոնենտի նվազումը, իհարկե, ազդում է, բայց պիտի ասեմ, որ վեց ամսվա տվյալներով ընդհանուր ներդրումների աճ ունենք՝ 4.7 միլիարդ դրամով:
-ԵՄ դեսպանը ևս երկու պայման նշեց ուղղակի նեդրումների աճի՝ ՀՀ-ում օրենսդրաիրավական համակարգը պետք է լինի կանխատեսելի և թափանցիկ, երրորդ՝ լուրջ ջանքեր պիտի գործադրվեն կոռուպցիայի դեմ պայքարի ուղղությամբ, քանի որ ըստ նրա, ոչ մի օտարերկրացի ներդրում չի անի, երբ երկրի իմիջը ստվերում են կոռուպցիայի դեմ պայքարի ոչ բավարար լինելու խնդիրները:
-Իհարկե, այստեղ առաջընթաց կա. այն օրենսդրական նախաձեռնությունները, ենթաօրենսդրական ակտերը, որոնք վերահսկում են կոռուպցիայի մոտիվացիաները, ի՞նչ են: Այսինքն՝ շահառուների թիվն են պակասեցնում, հարաբերությունները կրճատում և այլն: Սրանք բոլոր այն տարրերն են, որոնք կրճատում են ռիսկերը: Կոռուպցիան հայտարարելով չի կրճատվում, այլ կոնկրետ գործողություններով, իսկ դրանք ընդգրկված են կառավարության միջոցառումների ծրագրում, մասնավորապես՝ գործարար միջավայրի բարելավման:
-ԵՄ-ից տեղափոխվենք ԵՏՄ-ի դաշտ. ռուս տնտեսագետ, Նորագույն պետությունների ինստիտուտի տնօրեն Ալեքսեյ Մարտինովը վերջերս ի պատասխան հարցին, թե Հայաստանը ԵՏՄ-ին մոտ մեկ տարվա անդամակցումից ոչինչ չշահեց, շեշտեց.
«Հայաստանի համար սահմանված է էներգակիրների հնարավոր ամենացածր գինը, բացի դրանից, երկիրը ստացել է ոչ միայն ռուսական, այլ նաև ԵՏՄ անդամ մյուս երկրների տնտեսություններ մուտք գործելու հնարավորություն: Այսինքն` Հայաստանն ունի զարգացման լայն հնարավորություններ, որոնք արդեն ինքը պետք է կարողանա ռեալիզացնել, իր փոխարեն դա ոչ մեկ չի անելու»:
-Չեմ մեկնաբանում ուրիշներին, բայց կարող եմ ասել, որ ինն ամիս լինել մի կազմակերպության մեջ և արդեն թռիչքաձև բան սպասել, այն էլ, երբ գործընկեր երկրներում տնտեսական ցուցանիշներն այնքան էլ բարվոք չեն, եզրակացություն անելու համար շուտ է: Ինչ վերաբերում է գործիքներն օգտագործելուն, նշեմ մի շատ կարևոր հանգամանք՝ մեծ երկրների ձգտումը, մասնավորապես՝ Չինաստանի, Հնդկաստանի, որոնք ուզում են ԵՏՄ-ի հետ ազատ առևտրի համաձայնագիր կնքել, գնալ լուրջ պարզեցումների, սա լուրջ հնարավորություն է ՀՀ-ի համար: Այսինքն՝ օգտագործելով մասշտաբի էֆեկտը, նույնպես օգտվել այդ հնարավորությունից:
Մարիամ ՊԵՏՐՈՍՅԱՆ
Հետևեք մեզ նաև Telegram-ում