Հայաստանի եւ Ադրբեջանի նախագահների հանդիպումը էական փոփոխությունների չի հանգեցնի
Նմանատիպ
Մինչեւ տարեվերջ Հայաստանի եւ Ադրբեջանի նախագահների հանդիպումը կազմակերպելը շատ կարեւոր քայլ կլինի, որը հերթական անգամ կապացուցի, որ Հայաստանը երկխոսության կողմնակից է եւ ցանկացած ջանք գործադրում է խաղաղ բանակցությունների համար ի տարբերություն Ադրբեջանի, որն օգտագործում է իր բանակն ու հարցի կարգավորման առնչությամբ ռազմական դիրքորոշումներ ունի:
Այս տեսակետը քաղաքագետ Ռիչարդ Կիրակոսյանինն է: «Արմենպրես»-ի հետ զրույցում Կիրակոսյանը շեշտում է սակայն, որ գործնականում շատ քիչ բան կարելի է ակնկալել այդ հանդիպումից:
«Մենք կարող ենք հուսալ, բայց ոչ ակնկալել: Մենք կարող ենք հույս ունենալ, որ սա հնարավորություն է լարվածությունը նվազեցնելու համար, եւ փորձել բանակցություններ վարել դիվանագիտական լեզվով»,- ասաց Կիրակոսյանը:
Նա շեշտում է, թե անհնար է ակնկալել, որ նման հանդիպումները կարող են կողմերին ավելի մոտեցնել համաձայնագիր ստորագրելուն: «Ինչ էլ տեղի ունենա այդ հանդիպման ժամանակ, որքան էլ հանդիպումը լինի արդյունավետ եւ հաջողված, ակնհայտ է, որ հակամարտության երեք կողմերն էլ` Հայաստանը, Ադրբեջանն ու Լեռնային Ղարաբաղը ազատ են առաջարկելու իրենց տեսակետերը: Ադրբեջանը այս առումով մաքսիմալիստական տեսակետների կրող է եւ շատ բան է պահանջում: Հետեւաբար, մենք չենք կարող ակնկալել որեւէ էական իրական գործընթաց»,- ասաց Կիրակոսյանը` հավելելով, որ ներկա դրությամբ իրավիճակը վտանգավոր է այն առումով, որ հրադադարի ռեժիմի խախտումների ու կրակոցների հետեւանքով մարդիկ են մահանում: «Սա լարվածության շատ վտանգավոր մակարդակ է, եւ հենց այդ պատճառով շատ կարեւոր է, որպեսզի դիվանագիտությունը շարունակվի, եւ հարցի կարգավորումն ընթանա բանակցությունների միջոցով»,- ասաց Կիրակոսյանը:
Հետևեք մեզ նաև Telegram-ում