Բաքուն չի կարող սկսել նոր լայնամասշտաբ ռազմական գործողություններ. Ալեքսանդր Կռիլով

Բաքուն չի կարող սկսել նոր լայնամասշտաբ ռազմական գործողություններ. Ալեքսանդր Կռիլով

Տարածաշրջանում ուժերի ներկայիս հավասարակշռության պայմաններում Բաքուն չի կարող սկսել նոր լայնամասշտաբ ռազմական գործողություններ: Այս մասին «Արմենպրես»-ի հետ զրույցում նշեց քաղաքագետ Ալեքսանդր Կռիլովը:

«Ամեն ինչ կսահամանափակվի սադրիչ գործողություններով: Այդպիսի սցենարով պահվածքը Բաքվին հնարավորություն է տալիս խուսափել Ռուսաստանի և ՀԱՊԿ-ի միջամտությունից: Իր սահմանին մոտ շրջաններում իրավիճակի սրման հարցով Ռուսաստանը հետաքրքրված չէ: Հետևաբար նա ստիպված է ցուցաբերել առավել ակտիվություն ռազմական գործողությունների դադարեցման և իրավիճակի կայունության համար, քան ԵԱՀԿ Մինսկի խմբի համանախագահ մյուս երկրները»,- ասաց քաղաքագետը:

Անդրադառնալով ներկա փուլում ղարաբաղյան խնդրի հնարավոր լուծմանը` քաղաքագետը նշեց, որ վերջին տարիների փորձը ցույց է տալիս, որ ռազմական գործողությունների ակտիվացումից հետո լինում է դադար և այդ ընթացքում կարող են անցկացվել ինչ-որ բանակցություններ: Ըստ նրա` այդ բանակցություններն ավարտվում են` ձեռքբերելով համաձայնություն բանակցությունները շարունակելու հարցի շուրջ:

«Չնայած լինում է նաև այնպես, որ այդպիսի «տպավորիչ» արդյունքի էլ չեն հասնում: Քիչ հավանական է, որ ներկա «ինտենսիվ» բանակցությունները հանգեցնեն բեկման ղարաբաղյան խնդրի լուծման գործում, որովհետև կողմերը շարունակում են ունենալ միմյանց բացառող դիրքորոշումներ: Ավելի քան հավանական է, որ այս դանդաղընթաց պատերազմը կշարունակվի: Հայաստանին անհրաժեշտ է գտնել առավել արդյունավետ մեթոդներ` չեզոքացնելու Բաքվի դանդաղընթաց պատերազմի սցենարը»,-ավելացրեց քաղաքագետը:

Ալեքսանդր Կռիլովի խոսքով, իրավիճակը փոխելու համար, անհրաժեշտ է երկարատև աշխատանք` ուղղված հասարակական տրամադրությունների փոփոխությանը, կոնֆլիկտային մակարդակի նվազեցմանը, և, իհարկե, փոխադարձ վստահության մակարդակի բարձրացմանը: Ըստ նրա` նման ոչ մի գործընթաց չի նշմարվում, իրավիճակը զարգանում է բոլորովին հակառակ ուղղություններով: Ահա այստեղից էլ գալիս է փակուղին:

Խոսելով աշխարհաքաղաքական զարգացումներից ու դրա հնարավոր ազդեցությունից Հարավային Կովկասի վրա` քաղաքագետը նշեց, որ Հարավային Կովկասում ներկայիս իրավիճակի փոփոխության նախադրյալը կապված է ոչ այնքան Հարավային Կովկասում ընթացող զարգացումների հետ, որքան այն գործընթացների հետ, որոնք տեղի են ունենում իրենից հարավ ընկած տարածքում: «Ի՞նչ ուղղությամբ այնտեղ զարգացումները կընթանան, ի՞նչ ձևով դրանք կազդեն Հարավային Կովկասի և հարևան տարածաշրջանի վրա: Պատասխանել այդ հարցերին ոչ ոք չի կարող: Հետևաբար տրամաբանական է պատրաստ լինել տարածաշրջանի համար անցանկալի սցենարներին»,-հավելեց քաղաքագետը:

Հետևեք մեզ նաև Telegram-ում