Վրաստանի նախագահի, կառավարության եւ խորհրդարանի վարկանիշներն անկում են արձանագրել

Հայտնի են դարձել Միջազգային հանրապետական ինստիտուտի (IRI) կողմից Վրաստանում հասարակական կարծիքի ուսումնասիրության մի քանի արդյունքներ: Ինչպես տեղեկացնում է «Արմենպրես»-ը, հղում անելով «Գրուզիա Online»-ին, հետազոտությունները կատարվել են մարտի վերջին-ապրիլի սկզբին: IRI-ն դրանց արդյունքներին արդեն ծանոթացրել է Վրաստանի քաղաքական սուբյեկտներին: Հետազոտության արդյունքները կհրապարակվեն առաջիկա օրերին:

Ուսումնասիրության արդյունքների համաձայն՝ երկրում նախագահի ինստիտուտին լավ է վերաբերվում հարցվածների 46 տոկոսը: Ճիշտ նույնքանն էլ՝ 46 տոկոսը, հակառակ պատասխանն է տալիս: 2015 թվականին նախագահի ինստիտուտի վարկանիշը կազմում էր 51 տոկոս, 2014-ին՝ 64 տոկոս: Նախագահի ինստիտուտն ամենաբարձր վարկանիշն ուներ 2004 թվականի մայիսին՝ 84 տոկոս, ամենացածրը՝ 2003 թվականին՝ 20 տոկոս:

Վրաստանի կառավարությանը 2016 թվականին դրական է վերաբերվում հարցվածների միայն 36 տոկոսը այն դեպքում, երբ 2015-ին այդ ցուցանիշը կազմում էր 48 տոկոս, 2014-ին՝ 69 տոկոս, 2013-ին՝ 79 տոկոս եւ 81 տոկոս: Կառավարությունը նման ցածր ցուցանիշ ունեցել է 2007 թվականին՝ 36 տոկոս: Վրաստանի կառավարության ամենացածր վարկանիշը գրանցվել է 2003 թվականի մարտին՝ 17 տոկոս:

Ինչ վերաբերում է խորհրդարանին, ապա նրան լավ է վերաբերվում հարցվածների միայն 34 տոկոսը: Երկրի օրոնսդիր մարմնի ամենացածր վարկանիշը եղել է 2003 թվականի մայիսին՝ 18 տոկոս: 2015 թվականին խորհրդարանին լավ էր վերաբերվում հարցվածների 49 տոկոսը, 2014-ին՝ 68 տոկոսը, 2013-2012 թվականներին՝ 81 տոկոսը: