Ես, որպես անձ, միշտ բռնությանը դեմ եմ եղել և չեմ ողջունում այն. Լարիսա Ալավերդյան
Նմանատիպ
Արդեն վեց օր է, ինչ ազատամարտիկների միավորումը գրավել է Էրեբունու ոստիկանության գումարտակը՝ պատանդներ վերցնելով ոստիկաններին:
Այս օրերի ընթացքում Խորենացի փողոցում զանգվածային հավաքների ժամանակ ուժի կիրառում է եղել, որն ավելի սրեց իրավիճակը և պահպանվեց անջրպետը հասարակ քաղաքացու և ոստիկանի միջև:
Այս առիթով Yelaket.am- ը զրուցեց Մարդու իրավունքների առաջին պաշտպան Լարիսա Ալավերդյանի հետ:
«Բացի այս հիմնական գործողությունը, որ տեղի է ունեցել, մենք այսօր ունենք մեկ այլ իրավիճակ ևս, այն է՝ ոստիկանության խիստ ուժի կիրառումը և անօրինական գործողությունները: Դրանք, փաստորեն, ևս մեկ անգամ ցույց տվեցին , որ մեր իշխանությունները, որոնք որևէ խնդիր չեն լուծել՝ սոցիալական , տնտեսական, բարոյական, ապավինում են ոստիկանական ուժին, ոստիկանությունն էլ սկսում է ուժով ոտնահարել մարդու իրավունքներ՝ ոչ միայն խախտելով միջազգային նորմերը, այլ ուղղակի հայ ժողովրդին ներհատուկ քրիստոնեական նորմատիվային բազայի վրա հիմնված նորմերը, չգրված, այսպես ասած սովորույթային բնույթ կրող:
Դրա հետևանքով մենք տեսնում ենք, որ խնդիրներից մեկը, որն ի սկզբանե բոլորի կողմից հնչեցվում է արդեն տարիներ շարունակ և արդեն բերել է նրան, որ կան դժգոհություն այն չափի, որ որոշները սպառված համարելով բոլոր մնացած միջոցները զենք են վերցնում ձեռքին, փոխանակ այդ ժամանակ ոստիկանությունը պատշաճ գործի, հակառակը, կարծես թե սարսափեցնող ակցիաներ է նախաձեռնում: Եվ պարզ է, որ այսօր պետք է հստակ դրվի այդ ոստիկանության և նրա ղեկավարության վրա ճգնաժամային իրավիճակներում դրան լուծում տալուն ունակ լինելու հարցը, նրա գործելակերպը: Երբ որ իրավիճակը այսկերպ ճգնաժամային է լինում, և իշխանությունը ուզում է դրական կերպով հանգուցալուծել այս խնդիրը, ապա նա պետք է պարտադրի այդ ոստիկանությանը և բոլոր ուժային կառույցներին գործել խիստ նորմայի ներքո՝ այսինքն օրենքի և իրավունքի:
Դա տեղի չի ունեցել, հակառակը՝ տպավորություն է ստեղծվում, կամ էլ հատուկ է արվում, որպեսզի լարվածությունն ավելի ուժգնանա:
Մյուս խնդիրն այն է, որ տարիներ շարունակ այս իշխանությունները չեն լուծում խնդիրները: Ճգնաժամային պահերին բոլորը թաքնվում են չկան, չեն երևում, այսինքն ստացվում է, որ իխանությունները իրենք համաձայնվում են այն պնդման հետ, որ ունակ չեն կառավարել երկիրը: Այսպիսի դեպքերում, սովորաբար, գոնե մի քանի նախարարներ հրաժարական են տալիս»:
Զրույցի ընթացքում Լարիսա Ալավերդյանն անդրադարձավ նաև ՀՀԿ գործադիր մարմնի նիստի ժամանակ կուսակցության մամուլի խոսնակ Էդուարդ Շարմազանովի արած հայտարարությանը, թե իբր այսօր ժամանակը չէ պահանջներ դնելու:
«Երեկ ժամանակը չէր, այսօր ժամանակը չէ, բա, շատ կներեք, երբ է ժամանակը գալու: Նրանք վերջապես պարտավոր են արձագանք տալ զինված խմբի և տարիներ շարունակ ժողովրդի կողմից հնչող դժգոհություններին: Կառավարությունը լռում է, ԱԺ-ն անգամ հարկ չհամարեց արտահերթ նիստ անցկացնել: Այսպիսի դեպքերում եթե նախագահները լինում են այլ երկրներում, վերադառնում են, որ դիմեն ժողովրդին: Մեզ մոտ բոլորը երկրում են, բայց մենք իրենց ներկայությունը չենք զգում: Դրա համար, ես կարծում եմ, որ նախագահը պետք է որոշակի կոմպրոմիսների գոնե գնա, իսկ եթե ոչ, ապա իր հրաժարականի կոշտ պահանջը գնալով ուժգնանալու է»:
Մեր հարցին, թե վերջապես որն է լինելու այս ամենի տրամաբանական ավարտը, Մարդու իրավունքների պաշտպանը պատասխանեց.
«Ես չեմ ուզում խանգարել զինյալ խմբի գործընթացին, բայց եթե այդ զինված հարձակումն ունի կտրուկ, բայց դրական փոփոխությունների նպատակ, նշանակում է, որ իշխանությունները, եթե անգամ ցույց տան իրենց պատրաստակամությունը՝ այդ փոփոխություններին գնալու, միևնույն է վրա է հասնելու այն պահը, երբ այդ պահանջով ներկայացած տղաները, որոնք ընդգրկված են գործողությունների մեջ, որտեղ կա զոհ, վիրավոր և ի վերջո բավականին կարևոր հաստատության վրա հարձակման փաստ, այնուամենայնիվ, անգամ քրեական օրենսգիրքը պատժի կամ սանկցիայի չափը որոշելիս միշտ հաշվի է առնում նպատակները, նպատակադրումը և տվյալ անձի ինքնակենսագրությունն ու բնորոշիչ գծերը»:
Վերջում Լարիսա Ալավերդյանը այսկերպ ձևակերպեց իր անձնական վերաբերմունքը կատարվածի շուրջ.
«Մենք պետք է հասկանանք, որ սա բողոքի ձև է, որքան էլ կոշտ է իր ձևի մեջ, միևնույն է, չպետք է մոռանանք՝ ովքեր են նրանք և որն է նրանց պահանջը: Միաժամանակ պետք է նշեմ, որ ես, որպես անձ, միշտ բռնությանը դեմ եմ եղել և չեմ ողջունում այն. սա ծայրահեղ միջոց է, և մենք չգիտենք, թե ինչով է ավարտվելու, բայց տվյալ դեպքում բոլորս պետք է հասկանանք, որ պատմությունը չի սկվում նրանց հարձակման պահից»:
Հետևեք մեզ նաև Telegram-ում