Ավստրիայի նախագահն ու ՅՈՒՆԵՍԿՕ-ի տնօրենը շնորհավորել են Արմեն Սարգսյանին
Նմանատիպ
ՀՀ նախագահի պաշտոնում ընտրվելու առթիվ Արմեն Սարգսյանին շնորհավորական ուղերձ է հղել Ավստրիայի Դաշնային Հանրապետության նախագահ Ալեքսանդր Վան դեր Բելլեն։
Ինչպես տեղեկացրին Արմեն Սարգսյանի գրասենյակից, ուղերձում մասնավորապես ասված է․
«Սրտանց շնորհավորում եմ Ձեզ՝ Հայաստանի Հանրապետության նախագահ ընտրվելու կապակցությամբ:
Հայաստանը Ավստրիայի համար կարևոր գործընկեր է: Հայաստանի Հանրապետության անկախության հռչակումից անցած 25 տարվա ընթացքում թե՛ երկկողմ. թե՛ բազմակողմ մակարդակով մեր երկրների միջև հարաբերությունները բավականին դրական զարգացում են ապրել:
Ավստրիան մշտապես հանդես է եկել Եվրամիության եւ Հայաստանի միջև համագործակցության խորացման օգտին, ես ողջունել եմ 2017թ. նոյեմբերի 24-ին Բրյուսելում ԵՄ Արևելյան գործընկերության գագաթաժողովի շրջանակում համապարփակ ու ընդլայնված գործընկերության մասին համաձայնագրի ստորագրումը: Այս տարվա երկրորդ կեսին ԵՄ-ի խորհրդում Ավստրիայի նախագահության ընթացքում մենք կգործադրենք բոլոր հնարավոր ջանքերը, որպեսզի այդ գործընկերությունն էլ ավելի խորանա»:
Արմեն Սարգսյանին շնորհավորել է նաև ՅՈՒՆԵՍԿՕ-ի գլխավոր տնօրեն Օդրի Ազուլեն, ով իր շնորհավորական ուղերձում նորընտիր նախագահին մաղթել է հաջողություններ: Նա կարևորել է Հայաստանի ակտիվ ներգրավվածությունը ՅՈՒՆԵՍԿՕ-ի աշխատանքներում եւ բեղուն համագործակցությունը:
ՅՈՒՆԵՍԿՕ-ի գլխավոր տնօրենը նաեւ ողջունել է 2018թ-ի հոկտեմբերին Ֆրանկոֆոնիայի գագաթաժողովի անցկացումը Երեւանում՝ նշելով, որ ՅՈՒՆԵՍԿՕ-ն մեծապես շահագրգռված է համատեղ գործունեության միջոցով ակտիվ մասնակցություն ունենալ այդ կարեւոր իրադարձությանը:
Արմեն Սարգսյանին շնորհավորել են նաեւ Արեւելք-Արեւմուտք ինստիտուտի խորհրդի անդամ դեսպան Քամերոն Մունթերը, ՌԴ նախագահի միջազգային մշակութային համագործակցության գծով հատուկ ներկայացուցիչ Միխայիլ Շվիդկոյը, հասարակական, քաղաքական գործիչներ, մշակույթի, արվեստի ներկայացուցիչներ:
Հետևեք մեզ նաև Telegram-ում