Արցախում անհնար է գտնել մի այնպիսի պաշտոնյայի որդու, որը բանակում ծառայած չլինի. Լևոն Մնացականյան

Արցախում անհնար է գտնել մի այնպիսի պաշտոնյայի որդու, որը բանակում ծառայած չլինի. Լևոն Մնացականյան

ԵՐԵՎԱՆ, 24 ՀՈՒԼԻՍԻ, Times.am: ՀՀ վարչապետ Նիկոլ Փաշինյանի և ՀՀ պաշտպանության նախարար Դավիթ Տոնոյանի որդիները և, առհասարակ, բոլոր նորակոչիկները երջանիկ են, որ ծառայում են Արցախում:

Այս մասին հուլիսի 24-ին բանակային տարվա առաջին կիսամյակի ամփոփմանն ասաց Լեռնային Ղարաբաղի Հանրապետության պաշտպանության նախարար-պաշտպանության բանակի հրամանատար Լևոն Մնացականյանը:

Նա շեշտեց, որ Փաշինյանի և Տոնոյանի որդիները ֆիզիկապես պատրաստված են, բայց նրանց ծառայության մասին շատ բան չի կարող ասել:

«ՀՀ վարչապետի և ՊՆ նախարարի որդիները ծառայում են այնպիսի զորամասում, որ, հնարավոր է, խնդիր կատարեն նաև առաջնագծում, բայց մենք դա չենք բարձրաձայնում և դա նպատակահարմար չենք համարում, քանի որ այդ տեղեկությունը կարող է ավելորդ լարվածություն ստեղծել տվյալ ուղղությամբ»,-ընդգծեց Մնացականյանը:

Նրա խոսքով` Արցախի նախագահի որդին, իր որդին, ԱՀ գլխավոր դատախազ Արշավիր Ղարամյանի որդին, մի շարք մարզպետների որդիներ, անվտանգության ծառայության նախկին պետի որդին, դատախազի որդին, քաղաքապետների, հրամանատարների որդիները ծառայել են Արցախի պաշտպանության բանակում:

«Ապրիլյան գործողությունների ժամանակ նրանք իրենց ստորաբաժանումների հետ կատարել են խնդիրներ: Դուք չեք կարող Արցախի Հանրապետությունում գտնել մի այնպիսի պաշտոնյայի որդու, ով ծառայած չլինի: Ծառայությունից ազատվել կարող են միայն բուժզննության արդյունքում»,-եզրափակեց Լևոն Մնացականյանը:

Հետևեք մեզ նաև Telegram-ում