Մանվել Գրիգորյանին լուսանկարելն ու հրապարակելը իրավունքի խախտում է. Արտակ Զեյնալյան
Նմանատիպ
ԵՐԵՎԱՆ, 20 ՕԳՈՍՏՈՍԻ, Tert.am: Մանվել Գրիգորյանին լուսանկարելն ու հրապարակելը իրավունքի խախտում է, դատապարտելի է:
Այս մասին լրագրողների հետ զրույցում ասաց արդարադատության նախարար Արտակ Զեյնալյանը՝ հավելելով, որ իր հանձնարարությամբ ծառայողական քննություն է իրականացվում: Արտակ Զեյնալյանի դիտարկմամբ՝ լուսանկարը հրապարակել չէր կարելի՝ անկախ անձի հանդեպ վերաբերմունքից:
«Այդ լուսանկարը չի արվել «Կենտրոն» ՔԿՀ-ում, այն արվել է շատ ավելի վաղ՝ ձերբակալվածների պահման վայրում: Երբ դատապարտյալին լուսանկարում են, և այդ լուսանկարը հրապարակում են ԶԼՄ-ներում, սա իրավունքի խախտում է, եթե նույնիսկ ազատազրկվածը տվել է իր համաձայնությունը լուսանկարվելուն:
ԶԼՄ-ը պետք է ծանր ու թեթև անի՝ հրապարակի՞ այն, թե՞ ոչ, որովհետև ազատազրկման դատապարտվածի կամքը, հնարավոր է, ազատորեն չի ձևավորվել: Սա է պատճառը, որ դատապարտյալներին ընտրական իրավունք չի տրվում» ,– մանրամասնեց նա:
Հետևեք մեզ նաև Telegram-ում