«Իմ քայլը» դաշինքը 81.06%-ով հաղթանակ տարավ Երևանի ավագանու արտահերթ ընտրություններում

«Իմ քայլը» դաշինքը 81.06%-ով հաղթանակ տարավ Երևանի ավագանու արտահերթ ընտրություններում

ԵՐԵՎԱՆ, 24 ՍԵՊՏԵՄԲԵՐԻ, Tert.am: Կենտրոնական ընտրական հանձնաժողովը հրապարակել է Երևանի ավագանու արտահերթ ընտրությունների նախնական արդյունքները, որոնք ստացվել են մայրաքաղաքի բոլոր 475 ընտրատեղամասերից:

Ըստ այդմ՝ ձայների ճնշող մեծամասնությամբ՝ 294 109 քվե կամ 81.06%, առաջատարը «Իմ քայլը» դաշինքն է, որի ցուցակը գլխավորում է քաղաքապետի թեկնածու Հայկ Մարությանը:

Ի դեպ, համաձայն «Երևան քաղաքում տեղական ինքնակառավարման մասին» օրենքի, Հայկ Մարությանը համարվում է իրավունքի ուժով ընտրված քաղաքապետ, քանի որ ստացել է ձայների 50 տոկոսից ավելին:

«Եթե ավագանու ընտրությունների արդյունքով ընտրություններին մասնակցող կուսակցություններից մեկը ստանում է ավագանու անդամների տեղերի 50 տոկոսից ավելին, ապա այդ կուսակցության թեկնածուների ցուցակի առաջին հորիզոնականում գտնվող անձը օրենքի ուժով համարվում է ընտրված քաղաքապետ»,-ասված է օրենքի համապատասխան հոդվածում:

Ավագանու ընտրության նախնական արդյունքներով՝ երկրորդ տեղում 25 219 քվեով կամ 6.95 % ձայնով «Բարգավաճ Հայաստան» կուսակցությունն է:

Երրորդը «Լույս» դաշինքն է, որն ստացել է ընտրողների 4.99%-ի կամ 18 112 բնակչի քվեն:

Երևանի ավագանու արտահերթ ընտրություններին մասնակցում էին 8 կուսակցություն և 4 դաշինք:

Քվեները բաշխվել են հետևյալ կերպ.

«Բարգավաճ Հայաստան» կուսակցություն – 25 219 ձայն կամ 6.95%

«Երևանի հանրություն» կուսակցությունների դաշինքը – 2 502 ձայն կամ 0.69%

«Երևանցիներ» կուսակցությունների դաշինք – 2 985 ձայն կամ 0.82%

«Երկիր Ծիրանի» կուսակցություն –5 059 ձայն կամ 1.39%

«Ժառանգություն» կուսակցություն – 2709 ձայն կամ 0.75%

«Ժողովրդավարական ուղի» կուսակցություն –799 ձայն կամ 0.22%

«Իմ քայլը» կուսակցությունների դաշինք – 294 109 ձայն կամ 81.06%

«Լույս» կուսակցությունների դաշինք – 18 112ձայն կամ 4.99%

«Հայ հեղափոխական դաշնակցություն» կուսակցություն – 5 882 ձայն կամ 1.62%

Հայք (հայկազուններ) կուսակցություն – 692 ձայն կամ 0.19%

«Ռեֆորմիստներ» կուսակցություն – 792 ձայն կամ 0.22%

«Օրիաց երկիր» կուսացություն – 3948 ձայն կամ 1.09%

Երևանի ավագանու արտահերթ ընտրություններին քվեարկելու իրավունք ունեցող 848.343 քաղաքացիներից ընտրությանը մասնակցել է 370 323 քաղաքացի կամ ընտրողների 43.65 տոկոսը:

«Լույս» դաշինքը գլխավորող Արտակ Զեյնալյանն արդեն այցելել է «Իմ քայլը» դաշինքի նախընտրական շտաբ՝ շնորհավորելու Հայկ Մարությանին:

Հետևեք մեզ նաև Telegram-ում