Շատ ենք քայլել իրանց համար, որ այսօր պատգամավորի աշխատավարձ են ստանում, այդքան դժվա՞ր էր գալ ստեղ. ցուցարար (Տեսանյութ)
Նմանատիպ
ԵՐԵՎԱՆ, 12 ՀՈՒՆՎԱՐԻ, Aysor.am: Այսօր առավոտից Երևան-Էջմիածին ավտոճանապարհին բողոքի ցույց էր ընթանում ընդդեմ Մանվել Գրիգորյանի ազատ արձակման:
Կեսօրից ցուցարարները փակեցին ավտոճանապարհը՝ պահանջելով իրենց տարածքներից պատգամավորներ ընտրված անձանց միանալ իրենց:
Առաջինը ցուցարարներին հանդիպեց «Իմ քայլը» խմբակցության պատգամավոր Հայկ Սարգսյանը, ով հորդորեց ցուցարարներին բացել ճանապարհը՝ կոչ անելով բողոքի ցույցը տեղափոխել դատարանի դիմաց, որտեղ երկուշաբթի պետք է անցկացվի Գրիգորյանի գործով դատը:
Այնուհետև բանավեճ սկսվեց ցուցարարների մեջ, մի մասը պահանջում էր բացել ճանապարհ, մյուս մասը՝ դեմ էր: Նրանք հրաժարվում էին նաև բանակցել Հայկ Սարգսյանի հետ.
«Ես Հայկ Սարգսյանի հետ չեմ բանակցել ու բանակցությունների չեմ գնում: Ինձ առաջնորդողը ժողովուրդն է և իմ խիղճը: Այստեղ կանչել էի մեր մարզից ընտրված պատագմավորներին, ասել էի՝ ձեր հետ կխոսենք, ժողովրդի հետ կբանակցենք, կբացենք, բայց ո՞վ ա եկել, թող գային էն ծերից ոտով քայլեին, շատ ենք քայլել իրանց համար, որ այսօր պատգամավորի աշխատավարձ են ստանում, այդքան դժվա՞ր էր գալ ստեղ, թե՞ վախում են քաղաքական խմորումների մեջ մտնել», – Aysor.am-ի հետ զրույցում ասաց ակցիայի մասնակից Ջիվան Աբրահամյանը:
Քիչ անց ցուցարարներին միացան նաև այլ պատգամավորներ, նրանց թվում էր նաև «Իմ քայլը» դաշինքից Վիկտոր Ենգիբարյանը:
Պատգամավորների հետ խոսելուց, որոշ ժամանակ քննարկումներից հետո ցուցարարները որոշեցին բացել ճանապարհը:
Մանրամասները՝ տեսանյութում
Հետևեք մեզ նաև Telegram-ում