Նաիրա Զոհրաբյանը վնասվածք է ստացել

Նաիրա Զոհրաբյանը վնասվածք է ստացել

ԵՐԵՎԱՆ, 14 ՄԱՐՏԻ, Panorama.am: Օպերայի հարակից տարածքում ոստիկանների ու բողոքի ակցիայի մասնակիցների միջև առաջացած հրմշտոցի հետևանքով վնասվածքներէ ստացել ԱԺ ԲՀԿ-ական պատգամավոր Նաիրա Զոհրաբյանը։ Լրագրողների հետ զրույցում հայտարարեց նույն խմբակցությունից Արման Աբովյանը։

«Տեխնիկան կանգնած էր, ամբոխը եկավ, տիկին Զոհրաբյանը կանգնած էր, կարծես ճմռեց նրան և տիկին Զոհրաբյանն ընկավ, մենք նրան բարձրացրեցինք, ոտքն էր վնասվել»,-ասաց Արման Աբովյանը։

Քիչ առաջ Նաիրիա Զոհրաբյանն իր ֆեյսբուքյան էջում գրեց.

«Օպերայի տարածքում լարվածությունը չի թուլանում: Բռնությունը հարց չի լուծելու: Որպես ԱԺ մարդու իրավունքների պաշտպանության մշտական հանձնաժողովի նախագահ, Երևանի ԲՀԿ ավագանու իմ գործընկերների հետ փորձեցինք կանխել բախումները:

Հարցը ունի միայն մեկ լուծում` երկխոսություն և բանակցություն, ինչը դեռ չի ստացվում:
Որևէ մեկը դեմ չէ Օպերայի տարածքը կանաչապատելուն, սակայն ինչպե՞ս պետք է լուծվի մի քանի հարյուր աշխատակիցների խնդիրը, ովքեր տեղյակ էլ չեն նշյալ սրճարանների իրավական կարգավիճակից: Այդ մարդկանց քաղաքապետարանը առաջարկելու ոչինչ չունի, բացի տրակտորից, որը սառը անտարբերությամբ ջնջխում էր նրանց աշխատանքի վայրը:

Առանց երկխոսության` ոչինչ չի ստացվելու և բռնությունը բերելու է պատասխան բռնության: Կոչս նույնն է` կողմերը պետք է երկխոսեն և սրճարանների շարքային աշխատակիցներին պիտի առաջարկվեն ալտերնատիվ լուծումներ: Ինչ վերաբերվում է ինձ:

Իմ հանդեպ որևէ բռնություն չի գործադրվել:

Պարզապես, ես փորձեցի կանգնել ցուցարարների և ոստիկանների միջև` բախումը կանխելու համար և մի քիչ գերագնահատեցի իմ ֆիզիկական դիմացկունությունը: Թեթև վնասվածք է` կանցնի: Կարևորը` մեզ հաջողվեց այսօր կանխել իրավիճակի էլ ավելի սրումը:

Ամեն օր լինելու ենք Օպերայի տարածքում` շարունակելով կողմերին կոչ անել երկխոսության և թույլ չտալու բախումներ»։

Հետևեք մեզ նաև Telegram-ում