Թուրքիայում մեկնարկել է «ATAK-2» ռազմական ուղղաթիռի արտադրությունը

ԵՐԵՎԱՆ, 29 ԱՊՐԻԼԻ, Panorama.am: Թուրքիայի «Ավիացիայի և տիեզերագնացության արդյունաբերական ընկերությունը» (TUSAŞ) սկսել է «ATAK-2» ուղղաթիռի արտադրությունը։ Այս հարձակողական ուղղաթիռն առաջին անգամ կցուցադրվի միջազգային «IDEF 2019» ռազմարդյունաբերական ցուցահանդեսի շրջանակներում։ Այս մասին տեղեկացնում է Էրմենիհաբերը։

TUSAŞ-ը Թուրքիայի պաշտպանական արդյունաբերության վարչության հետ «ATAK-2»-ի արտադրության վերաբերյալ պայմանագիր էր կնքել 2019թ․ փետրվարին։ Երկու ամիս անց արդեն պատրաստ է ուղղաթիռի իրական չափերով նախագծված առաջին մոդելը, որն էլ կցուցադրվի «IDEF»-ում։

Նախագծի համաձայն՝ «ATAK-2» ռազմական ուղղաթիռը ընդունակ կլինի տեղափոխել ծանր բեռներ, դիմանալ միջավայրի անբարենպաստ պայմաններին, առաջատար տեխնոլոգիաների միջոցով հետևել և տեսագրել թիրախը։ Ուղղաթիռը նաև հագեցած կլինի նավիգացիոն, հաղորդակցման համակարգերով, ինչպես նաև՝ մեծ հեռահարության հակատանկային և «օդ-օդ» տեսակի հրթիռային համակարգերով։

Նախատեսվում է «ATAK-2»-ի արտադրության մեջ առավելագույնի հասցնել տեղական միջոցների օգտագործումը, ինչպես նաև՝ ապահովել ռազմական ուղղաթիռների հետագա արտահանումը այլ երկրներ։

Թուրքական մամուլի տեղեկությունների համաձայն՝ «ATAK-2»-ը այսօր առկա նույն դասի ուղղաթիռներից շուրջ երկու անգամ ավելի ծանր կլինի։ 10 տոննա կշռող ուղղաթիռը կունենա երկու տուրբովալ շարժիչ և կկարողանա տեղափոխել մինչև 1․200 կիլոգրամ կշռող բեռներ։