Իրական ձեռքբերումներ չեն կարող լինել, քանի դեռ չենք լրջացել. ՀՅԴ անդամ

ԵՐԵՎԱՆ, 23 ՄԱՅԻՍԻ, Aysor.am: Հայաստանի քաղաքացիների մի մասը համաձայն չէ և մտահոգ է երկրում տեղի ունեցող գործընթացներով, այսօր տեղի ունեցած հանրահավաքի ժամանակ ասաց ՀՅԴ գերագույն մարմնի անդամ Արթուր Խաչատրյանը։

«Մեր հայտնած կարծիքը կարող է ոմանց դուր չգալ, բայց մեր սիրտն այս երկրի համար պակաս չի ցավում, քան այլոց սիրտը։ Կառավարության ղեկավարը մի քանի օր առաջ 100 ձեռքբերում ներկայացրեց, բայց որպես ձեռքբերում է ներկայացված, օրինակ, նախարարությունների միավորումը։ Բայց այդ միավորման արդյունքում մշակութային կյա՞նքն ակտիվացավ, գյուղացու կյա՞նքը բարելավվեց, սփյուռքի հետ հարաբերություննե՞րն ամրապնդվեցին», – հարց ուղղեց նա։

Դաշնակցական գործիչը շեշտեց՝ 100 ձեռքբերումներից շատերը նախորդ կառավարության ծրագրերի շարունակությունն են։

«Իրական ձեռքբերումներ չեն կարող լինել, քանի դեռ չենք լրջացել։ Ո՞ւր է տնտեսական հեղափոխությունը, տնտեսության կառուցվածքի փոփոխություն է անհրաժեշտ։ Եթե կան կոռուպցիա և օլիգարխիա, տնտեսությունը չի զարգանում, բայց դրանց վերացումը չի երաշխավորում տնտեսական զարգացումը։ Դրա համար պետք է ակտիվ տնտեսական քաղաքականություն իրականացնել», – ընդգծեց Արթուր Խաչատրյանը։