Հրայր Թովմասյանը պետք է պայքարի Սահմանադրությունը և դատարանի անկախությունը փրկելու համար. Վազգեն Մանուկյան

ԵՐԵՎԱՆ, 24 ՀՈՒՆԻՍԻ, Aysor.am: Հանրային խորհրդի նախագահ, ԱԺՄ նախագահ Վազգեն Մանուկյանը «Անկախ»-ի հետ զրույցում անդրադարձել է ՍԴ անդամ Վահե Գրիգորյանի հայտարարությանը։

– Պարոն Մանուկյան, ինչպե՞ս կմեկնաբանեք Սահմանադրական դատարանի դատավոր ընտրված Վահե Գրիգորյանի այն հայտարարությանը, թե ինքը ստանձնում է ՍԴ նախագահի պաշտոնը։

– Եթե մեկը ուշադիր կարդա ՀՀ Սահմանադրության անցումային դրույթների 213-րդ հոդվածը, «Սահմանադրական դատարանի մասին» ՀՀ սահմանադրական օրենքի 12-րդ կետը, ՀՀ Սահմանադրության 168-րդ հոդվածը, ապա ակնհայտ կլինի, որ Վահե Գրիգորյանի ասածն ուղղակի անհեթեթություն է։ Բացի այդ, Սահմանադրական դատարանի նախագահին չի կարող փոխել ո՛չ ՀՀ նախագահը, ո՛չ Ազգային ժողովը, ոչ էլ կառավարությունը։ Բայց այս ամենի մեջ ինձ ուրիշ բան է մտահոգում․ մենք դաստիարակություն ենք ստացել մեր ընտանիքներում, բակում, դպրոցում, հասարակության մեջ, անցել ենք տասնյակ տարիների կյանք, և ես առաջին անգամ եմ լսում, որ մարդն ինքն իրեն հռչակի նման կարգավիճակ։ Ինչ-որ նոր տեսակի մարդիկ են աճել, որոնց ես երբեք չեմ հանդիպել իմ կյանքում։ Մտահոգիչ է, որ արդեն այդպիսի մարդիկ կան հասարակության մեջ։

– Հնարավոր համարո՞ւմ եք, արդյոք, որ ճնշումների հետևանքով Սահմանադրական դատարանի նախագահ Հրայր Թովմասյանը հրաժարական տա։

– Գիտե՞ք, վերջիվերջո մեր ժողովուրդը հիմար չէ, որ ամեն մի կոչով ճնշումներ անի։ Խոսքը մի քանի հարյուր մարդու մասին չէ։ Իսկապես կարող է մի քանի հարյուր մարդ դեմ լինի նրան և պահանջի հրաժարական, բայց այն համաժողովրդական ճնշումները, որ կային մեկ տարի առաջ, այս պահին, այս հարցի շուրջ կրկնել հնարավոր չէ։ Հրայր Թովմասյանն ունի մաքուր կենսագրություն, այսինքն՝ ոչ մի բանից կպչել հնարավոր չէ։ Ոչ ոք չի կասկածում Հրայր Թովմասյանի պրոֆեսիոնալ հատկություններին։ Ես վաղուց եմ ճանաչում նրան, մեր կուսակցության հետ կապված մարդ է եղել, և նրա մեջ կամային հատկությունները բավականին բարձր են, նա հեշտությամբ ճնշումներին չի ենթարկվի։ Այստեղ հարցն իր պաշտոնի մասին չէ, այլ երևույթի մասին է, այսինքն՝ Հրայր Թովմասյանը պետք է պայքարի ոչ թե իր պաշտոնը, այլ Հայաստանի Հանրապետության Սահմանադրությունը և դատարանի անկախությունը փրկելու համար։ Տեգեր: Վազգեն Մանուկյան, Վահե Գրիգորյան, Հանրային խորհուրդ, ԱԺՄ, Հայաստան, հարցազրույց, Սահմանադրություն Կարդացեք նաև` ​Իրավունքի մեկնաբանումը ունի գիտական կանոններ և չպետք է վերածվի բառախաղի. Նորա Սարգսյանը՝ Վահե Գրիգորյանի հայտարարության մասին Ինչպես տեսնում եք՝ ես աշխատանքի եմ գնում, եթե անհրաժեշտություն լինի, հայտարարություն կանեմ. Հրայր Թովմասյան Եթե Վահե Գրիգորյանը այդ ուղղությամբ քայլեր անի՝ կհայտնվի քրեական տիրույթում. Դավիթ Հարությունյան «Քաղաքականություն է, սըր». Ավետիք Իշխանյան Տեղի ունեցածը ոչ այլ ինչ է, քան Սահմանադրության հուղարկավորություն».Վարդան Այվազյան