Սինանյանի առաջին այցը ցույց տվեց, որ այն, ինչի համար սփյուռքի նախարարությանը քննադատում էին, անհրաժեշտություն էր. Հերմինե Մխիթարյան

ԵՐԵՎԱՆ, 23 ՀՈՒԼԻՍԻ, Times.am: Հուլիսի 18-23-ը հնգօրյա աշխատանքային այցով Ռուսաստանի Դաշնությունում էր սփյուռքի հարցերով նորանշանակ գլխավոր հանձնակատար Զարեհ Սինանյանը: Մի շարք հանդիպումներ տեղի ունեցան Ռուսաստանի հայկական համայնքի, ՀՅԴ Հայ դատի մոսկովյան հանձնախմբի ներկայացուցիչների հետ, այցի ավարտին Զարեհ Սինանյանը հանդիպեց նաև ՌԴ փոխարտգործնախարար Գրիգորի Կարասինի հետ: Այցի օրակարգի, արդյունքների ու հետագա ակնակալիքների շուրջ Times.am-ը զրուցել է «Հայացք» վերլուծական կենտրոնի փորձագետ Հերմինե Մխիթարյանի հետ:

«Գլենդելի նախկին քաղաքապետ Զարեհ Սինանյանի նշանակումը սփյուռքի հարցերով հանձնակատարի պաշտոնում ոչ միանշանակ էր ընդունվել սփյուռքի հայկական շատ գաղթօջախներում: Այս տեսանկյունից առաջին այցի՝ դեպի Ռուսաստան ընտրված ուղղությունը հասկանալի ու տրամաբանական է: Տրամաբանական էր նաև այցի ու հանդիպումների օրակարգը. նորանշանակ հանձնակատարը ծանոթության փուլում է», – նշեց փորձագետը:

Բավարա՞ր էր արդյոք հինգ օրը Ռուսաստանի հայության խնդիրների հետ ծանոթանալու համար: Փորձագետի համոզմամբ՝ իհարկե ոչ: «Սակայն բավարար էր հասկանալու համար, որ այն, ինչի համար նախկինում գործող սփյուռքի նախարարությանը քննադատում էին, ավելորդ էին համարում, իրականում անհրաժեշտություն է: Խոսքը, օրինակ, սփյուռքի հայկական գաղթօջախների համար հայերեն գրքերի, հատկապես՝ դպրոցական ձեռնարկների մասին է: Հատկանշական է, որ սփյուռքի ներկայացուցիչների հետ հանդիպման հենց առաջին օրը բարձրացվեց այս հարցը, ինչին ի պատասխան Սինանյանը նախ նշեց, որ իրենց կառույցն այլևս չի զբաղվելու գրքեր տպելով, ապա, լսելով համայնքի ներկայացուցիչներին, հայտարարեց, որ հավանաբար, ամեն դեպքում կզբաղվեն դրանով: Սա ընդամենը մեկ օրինակ է», – նշեց փորձագետը՝ հավելելով, որ սփյուռքի նախարարությանը փոխարինելու եկած գլխավոր հանձնակատարի գրասենյակն առաջին հերթին իր կազմով և դրանում սփյուռքի հիմնական գաղթօջախների ներգրավման ապահովմամբ պիտի վկայի այն մասին, որ հայկական սփյուռքի բոլոր շերտերի ու հատվածների խնդիրները հասկացվում, ընկալվում են և դրանց լուծման ուղղությամբ սրտացավ ու հետևողական աշխատանք է իրականացվում: «Նորաստեղծ մարմնի կազմում պիտի իրենց ներգրավվածությունն ունենան ինչպես Ռուսաստանի, այնպես էլ հայկական սփյուռքի այլ խոշոր համայնքների ներկայացուցիչները, ինչը կլուծի մի շարք խնդիրներ, այդ թվում և այն, որ սփյուռքի հետ աշխատանքների համակարգումը վստահվել է սփյուռքի կոնկրետ մի համայնքը ներկայացնող գործչին», – ամփոփեց փորձագետը: