Անահիտ Բախշյան. Վաղը գնում ենք երթի՝ ի պաշտպանություն Ամուլսարի
Նմանատիպ
ԵՐԵՎԱՆ, 13 ՍԵՊՏԵՄԲԵՐԻ, Panorama.am: Քաղաքական, հասարակական գործիչ Անահիտ Բախշյանը քիչ առաջ տեղեկացրեց՝ սեպտեմբերի 14-ին ժամը 18։30-ից սկսած տարբեր ուղղություններով քայլերթ են իրականացնելու ի պաշտպանություն Ամուլսարի։
«Մենք դա պարտավոր ենք անել, մենք պատասխանտու են մեր երկրում յուրաքանչյուր որոշման համար»,-ասաց Անահիտ Բախշյանը։
Նա հիշեցրեց «Մենք ենք տերը մեր երկրի» կարգախոսի մասին, ընդգծեց՝ պետք է տեր կանգնել երկրի անվտանգությանը, բնությանը։
«Վաղը գնում ենք երթի՝ ի պաշտպանություն Ամուլսարի»,-նշեց նա։
«Ամուլսարն առանց հանքի» նախաձեռնությունից էլ հայտնում են, որ շաբաթ օրը` սեպտեմբերի 14-ին, 18:30-ին, նախաձեռնությունը մայրաքաղաքում միաժամանակ մի քանի ուղղություններով կիրականացնի քայլերթ` ի պաշտպանություն Ամուլսարի:
Երթին Ջերմուկից ավտոշարասյունով միանալու են նաև հենց Սարի պահապանները: Երթը կեզրափակվի Ազատության հրապարակում` 20:00-ին:
Նախաձեռնած երեք երթուղիներն են՝
Երթուղի-1 / 18:30-Սկզբնակետը՝ Զորավար Անդրանիկի Արձանի առաջ՝ Տիգրան Մեծ փողոց։ -Հանրապետության Հրապարակ-Աբովյան Փողոց-Հյուսիսային Պողոտա-Ազատության Հրապարակ
Երթուղի-2 / 18:30-Սկզբնակետը՝ Բաղրամյան Մետրոյի հարակից տարածք։-Բաղրամյան փողոց-Ֆրանսիական հրապարակ-Սայաթ-Նովա փողոց -Ազատության Հրապարակ
Երթուղի-3 / 18:30-Սկզբնակետը՝ Քաղաքապետարանի հարակից տարածք-Գ. Լուսավորիչ փողոց-Մաշտոցի պողոտա-Ազատության Հրապարակ։
«Պահանջը հստակ է՝ Ամուլսարն առանց հանքի»,- նշում են նախաձեռնությունից։
Հետևեք մեզ նաև Telegram-ում