2020թ. բյուեջով նախատեսված եկամուտներն ու ծախսերն իրականում ցույց են տալիս իշխանությունների համար սահմանված առաջնահերթությունները. փորձագետ
Նմանատիպ
ԵՐԵՎԱՆ, 22 ՀՈԿՏԵՄԲԵՐԻ, Times.am: Շարունակվում են պետական բյուջեի նախագծի շուրջ քննարկումները: Թիրախում ռազմական ծախսերի աննշան ավելացումն է: «Եկող տարվա բյուջեով սահմանված ծախսերն ու եկամուտներն արտացոլում են իշխանության՝ պետական կառավարման մասին իրական պատկերացումները, որոնք, ինչպես երևում է շատ հաճախ մտնում են տրված խոստումների հետ հակասության մեջ»,- բյուջեի նախագծի վերաբերյալ Times.am-ի հետ զրույցում նկատեց «Հայացք» վերլուծական կենտրոնի փորձագետ Լիլիա Ամիրխանյանը:
«Բյուջեի նախագծում նախատեսված եկամուտներն ու ծախսերը որևէ իրատեսական հույս չեն արթնացնում խոստացված հեղափոխական մոտեցումների, առավել ևս՝ տնտեսական հեղափոխության իրականացման տեսանկյունից: Ըստ էության, բյուջեում հեղափոխական ոչինչ չկա. որևէ կերպ, համենայն դեպս նախագծով, չեն երևում դեպի Հայաստան՝ իշխանափոխությամբ պայմանավորված եկամտային հոսքերը: Իրականում, դրանք իրատեսական չէին, պարզապես դրանց մասին հանրությանը խոստացվել է, ուստի ցավով պետք է նկատել, որ արդեն եկող տարվանից հանրային հիասթափության ալիքը կակտիվանա»,- նշեց փորձագետ:
Լ. Ամիրխանյանի պնդմամբ, աշխատավարձային և կենսաթոշակային ֆոնդերում որոշակի բարելավումը սկզբնական շրջանում որոշակի դրական տրամադրություն կապահովի, սակայն քիչ ժամանակ անց դա նույնպես կանցնի: «Աշխատավարձի կամ թոշակի սպասվող տասը տոկոսանոց ավելացումն արդեն, այսպես ասած, «ծախսված եկամուտ» է, քանի որ գների ընդհանուր աճն արդեն գերազանցել է եկամուտների նշված աճը և դրա ընկալումը շատ արագ հանրության մոտ կգա: Բացի այդ, շրջանառվում է նախարարների աշխատավարձերը կրկնակի բարձրացնելու փաստը, որի հերքումն այս պահին չկա: Եվ եթե դա իսկապես հաստատվի, ապա սոցիալական անարդարության ճեղքը զգալիորեն կլայնանա: Սրանք խնդիրներ են, որոնց օպտիմալ լուծման զգացողություն բյուջեի նախագծով սահմանված հոդվածները չեն առաջացնում»:
«Նախատեսվող բյուջեում առաջնային ոլորտը շարունակում է մնալ սոցիալական պաշտպանությունը, ինչպես և եղել է վերջին տարիներին: 2020-ին ոլորտին հատկացվող գումարները 2019թ.-ի համեմատ ավելացել են 10,2 տոկոսով: 10 տոկոսով ավելանալու են ընդհանուր բնույթի հանրային ծառայություններին հատկացվող բյուջետային գումարները: Բյուջեի ծախսերի երրորդ խոշոր ոլորտը պաշտպանության ոլորտն է, սակայն աճն այստեղ անհամեմատ փոքր է՝ 0,8 տոկոս: Թերևս այս բյուջեից միակ «հեղափոխական» փաստն արձանագրենք հենց պաշտպանական ծախսերը. կրճատվող ծախսեր անվտանգային խդիրներով ժամ առ ժամ մոլեգնող տարածաշրջանում»,- մանրամասնեց փորձագետը:
Լ. Ամիրխանյանը պնդում է՝ սոցիալական ոլորտին ուղղվող ծախսերի մեծացումն ի հաշիվ ավտանգության, ոչ այլ ինչ է, քան վազք բազմիցս հնչեցված խոստումների ՝ ինչ-որ մասի, ինչ-որ չափով իրականացման հետևից: «Սա սեփական ձեռքով ստեղծված թակարդ է, որում այսօր հայտնվել է իշխանությունը, քանի որ մեր կարգավիճակում գտնվող երկրի համար ի հաշիվ պաշտպանության արվող ծախսերը ոչ մի կերպ չեն կարող արդարացված լինել»,- ամփոփեց փորձագետը:
Հետևեք մեզ նաև Telegram-ում