Նաիրի Հունանյանը դիմել է վաղաժամկետ ազատ արձակման խնդրանքով

Նաիրի Հունանյանը դիմել է վաղաժամկետ ազատ արձակման խնդրանքով

ԵՐԵՎԱՆ, 22 ՀՈԿՏԵՄԲԵՐԻ, 24News: «Հոկտեմբերի 27-ի» գործով ահաբեկչական խմբավորման ղեկավար Նաիրի Հունանյանը, որը դատապարտված է ցմահ ազատազրկման և իր պատիժը կրում է «Երևան Կենտրոն» քրեակատարողական հիմնարկում, դիմել է վաղաժամկետ ազատ արձակման խնդրանքով։ Այս մասին 24News-ին հայտնեց ՀՀ ԱՆ քրեակատարողական ծառայության հանրային կապերի բաժնի պետ Նոնա Նավիկյանը։ Ըստ վերջինիս՝ Հունանյանը համապատասխան դիմում է ներկայացրել մոտ երկու շաբաթ առաջ, այն ընթացքի մեջ է։

«Դատապարտյալը դիմում է քրեակատարողական ծառայությանը, քրեակատարողական ծառայությունն էլ տեղաբաշխման հանձնաժողովի նիստ է կազմում, և այդ նիստի ժամանակ քննարկվում է դիմումը։ Դրանից զատ «պրոբացիան» է եզրակացությունը կազմում և տալիս», – նշել է Նավիկյանը՝ հավելելով, որ «քանի որ Հունանյանի ազատազրկման 20 տարին լրացել է, 20 տարուց հետո ցմահ դատապարտյալները իրավունք ունեն դիմել պայմանական վաղաժամկետ ազատման համար»։

«Չեմ կարող ասել, թե գործընթացն ինչքան կարող է տևել, որովհետև ամեն դատապարտյալի դեպքում ժամկետները տարբեր են լինում», – եզրափակել է ՀՀ ԱՆ քրեակատարողական ծառայության հանրային կապերի բաժնի պետը։

Ահաբեկիչ Նաիրի Հունանյանը «Հոկտեմբերի 27-ի» պետական ահաբեկչությունը իրականացրած խմբի ղեկավարն է։ Այս տարի լրանում է ընդդեմ պետության իրականացրած ոճրագործության 20-րդ տարելիցը։

 

Հետևեք մեզ նաև Telegram-ում