Հայ առաքելական եկեղեցին վաղը կնշի Խաչի գյուտի օրը

Հայ առաքելական եկեղեցին վաղը կնշի Խաչի գյուտի օրը

ԵՐԵՎԱՆ, 26 ՀՈԿՏԵՄԲԵՐԻ, Qahana.am: Վաղը՝ հոկտեմբերի 27-ին կնշվի Խաչի գյուտի օրը։ Հայ առաքելական եկեղեցու Արարատյան թեմից հայտնում են, որ այն Քրիստոսի խաչափայտին նվիրված չորս տոներից է:

327 թվականին բյուզանդական Կոստանդիանոս կայսեր մայրը` Հեղինեն, Տիրոջ խաչը գտնելու նպատակով այցելում է Երուսաղեմ: Հուդա անունով մի հրեա օգնում է կայսրուհուն գտնել Քրիստոսի խաչվելու վայրը` Գողգոթան, որտեղ որոնումների արդյունքում հայտնաբերվում են Հիսուսի և նրան խաչակից երկու ավազակների խաչերը:

Տիրոջ խաչը ճանաչելու համար մի պատանու դիակ հերթով դնում են դրանց վրա, որոնցից մեկի վրա պատանին հարություն է առնում, և այդպես ճանաչվում է տերունական խաչը:

Այդ հրաշքից հրեա Հուդան քրիստոնեություն է ընդունում և հետո դառնում է Երուսաղեմի Կյուրեղ եպիսկոպոսը: Խաչափայտի գյուտից հետո Հեղինեն բարեզարդում է Երուսաղեմի սրբազան վայրերը, իսկ Գողգոթայում կառուցում Ս. Հարություն եկեղեցին, որտեղ հետագայում զետեղվում է Տիրոջ խաչափայտը:

Հետևեք մեզ նաև Telegram-ում