AM | RU
USD
EUR
RUB

Բանակի օրվա առիթով Սուրբ Պատարագ է մատուցվել և պարգևաբաշխություն կայացել

 

ԵՐԵՎԱՆ, 27 ՀՈՒՆՎԱՐԻ, Panorama.am: Հունվարի 26-ին, հանդիսապետությամբ Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի, Արմավիրի թեմի Ս. Աստվածածին եկեղեցում (ք. Էջմիածին) Հայոց բանակի օրվա կապակցությամբ մատուցվել է Ս. Պատարագ: Պատարագիչն էր ՀՀ ԶՈՒ հոգևոր առաջնորդ Գերաշնորհ Տ. Վրթանես եպիսկոպոս Աբրահամյանը: Մայր Աթոռի տեղեկատվական համակարգից հայտնում են, որ սրբազան արարողությանը ներկա են եղել Հայաստանի Հանրապետության Պաշտպանության նախարար Դավիթ Տոնոյանը, ՀՀ ԶՈւ ԳՇ պետ, գեներալ-լեյտենանտ Արտակ Դավթյանը, ՊԲ հրամանատար, գեներալ-մայոր Կարեն Աբրահամյանը, Մայր Աթոռի միաբաններ, ՀՀ ԶՈւ բարձրագույն սպայական կազմի ներկայացուցիչներ, ՀՀ ԶՈւ Հոգևոր առաջնորդության գնդերեցներ:

Իր քարոզում Վրթանես Սրբազանը, անդրադառնալով օրվա խորհրդին, ի մասնավորի նշել է, որ Հայ Եկեղեցու ծոցում կյանք ու հասակ առած ամեն գիտակից հայորդու համար հզոր պետականությունը հավատքի, սիրո և նվիրյալ ծառայության միասնությունն է, և այդ համոզումն է, որ օրըստօրե քարոզում ու իրենց հոգևոր խնամքին հանձնված զինվորականներին են ջամբում Հայոց բանակում սպասավորող գնդերեցները։

«Հայրենիքն ու պետականությունն աստվածատուր պարգևներ են, ուստի և արժանի ամենօրյա անսակարկ սիրո ու հոգածության, իսկ մեզ՝ հայերիս համար, ևս առավել։ ․․․Հայրենիքը մեր մեծագույն գանձն է, ուստի այստեղ պիտի լինեն նաև մեր սրտերը՝ սերը, նվիրումն ու նախանձախնդրությունը առ հայրենին, ըստ ավետարանական խոսքի՝ «Ուր ձեր գանձերն են, այնտեղ և ձեր սրտերը կլինեն» (Մատթ․ Զ 21)։

«Բաներ կան, որ հավիտենական պաշտելի են՝ Աստված, Հայրենիք, Մայր, որոնց մասին մարդ արարածը, եթե հոգեպես խավարած չէ, չի կարող առանց կրոնական հարգանքի խոսել»,- ասում է մեծն Նժդեհը։ Բոլորանվեր ու անձը տալու պատրաստակամությամբ արտահայտվող ճշմարիտ սերը, Սերն ինքնին, տեսնում ու սովորում ենք մեր Տիրոջից (Հովհ․ ԺԵ 13)։ «Սիրո հացի համար խմո՛ր եղեք»,- կոչ է անում անվանի հայ բանաստեղծ Վահան Թեքեյանը։ Այս սերն է, որ քարոզվում է մեր եկեղեցիների խորաններից, որ սովորեցնում ենք մեր զավակներին և որ միախառնվելով հավատին՝ վերածվում է նվիրյալ ծառայության՝ անկախ այդ ծառայության ոլորտից։ Մեր սերնդակիցների անօրինակ ծառայությունն ու նվիրումն է, որ ծնունդ տվեցին հայոց նորօրյա պետականությանն ու բանակին, իսկ այսօրվա զինվորների ու սպաների դարձյալ նվիրյալ ծառայության շնորհիվ հարատևում է քրիստոնյա աշխարհի արևելյան սահման մեր սիրասուն երկիրը։ Այսօր հիշում և գլուխ ենք խոնարհում բոլոր այն քաջերի հիշատակի առաջ, որ իրենց կյանքն են դրել հայրենիքի զոհասեղանին, նաև այն կանանց ու տղամարդկանց, որ իրենց երիտասարդությունն ու ավյունն են տվել աստվածահաճո այս առաքելությանը և այսօր կոչվել են վաստակած հանգստի»,- ասել է Վրթանես եպիսկոպոսը՝ հավելելով, որ առաջընթացի համար պետք է լցվել հավատով ու սիրով և բռնել Աստվածորդու ձեռքը, որովհետև Քրիստոսով վախը դառնում է քաջալերություն, թշնամանքը՝ եղբայրասիրություն, բանսարկությունն ու զրպարտությունը՝ ուղղամտություն ու ճշմարտախոսություն:

Վերջում շնորհավորելով ներկաներին Հայոց բանակի կազմավորման 28 տարեդարձի կապակցությամբ՝ Վրթանես Սրբազանը մաղթել է, որ Տերն իր օրհնությունների մեջ պահի-պահպանի Հայոց բանակը՝ հայ ժողովրդի անկախ պետության հարատևության գրավականը, և յուրաքանչյուր զինվորականի՝ որպես այդ կուռ կառույցի անփոխարինելի մաս՝ ամենախոնարհ աստիճանից մինչև ամենաբարձրը, առաջնորդի անսասան հավատով և Տիրոջ կամքը գործադրելու ձգտումով:

Ս. Պատարագի ավարտին, հանդիսապետությամբ Ամենայն Հայոց Կաթողիկոսի, կատարվել է Հանրապետական մաղթանք, որի ժամանակ հոգևոր դասը և արարողությանը ներկա ժողովուրդը աղոթք բարձրացրեցին առ Բարձրյալն Աստված Հայաստան աշխարհի խաղաղության, անսասանության, առաջընթացի և Հայոց բանակի հաղթական ընթացքի համար:

Այնուհետև Գևորգյան հոգևոր ճեմարանի հանդիսությունների դահլիճում տեղի է ունեցել պաշտոնական ընդունելություն, որի ընթացքում կատարվել է պարգևաբաշխություն: Ի գնահատություն Հայրենիքին մատուցած ծառայությունների, Ամենայն Հայոց Կաթողիկոսը, ընդառաջ ՀՀ ԶՈւ հոգևոր առաջնորդ Վրթանես եպիսկոպոսի միջնորդությանը, Հայ Եկեղեցու «Սուրբ Ներսես Շնորհալի» պատվո բարձր շքանշանի արժանացրել է մի շարք բարձրաստիճան զինվորականների:

Նորին Սրբությունը «Սուրբ Ներսես Շնորհալի» շքանշան հանձնել է ՀՀ Պաշտպանության նախարարի տեղակալ, ի.գ.թ. Գաբրիել Բալայանին, ՀՀ ԶՈւ պատրաստության գլխավոր վարչության մարտական պատրաստության վարչության պետ գեներալ-մայոր Վալերի Քոչարյանին, ՀՀ ՊՆ Ռազմական ոստիկանության պետ գնդապետ Արթուր Բաղդասարյանին, ՀՀ Պաշտպանության նախարարի խորհրդական գնդապետ Աշոտ Բալասանյանին և ՀՀ ԶՈւ Հոգևոր առաջնորդության բարերար տիար Արամ Ֆրանկյանին:

Ընդունելության ժամանակ ՀՀ Պաշտպանության նախարարի հրամանով զինծառայողների հոգևոր և հայրենասիրական դաստիարակության գործում զգալի ավանդի համար մի շարք եկեղեցականներ և մեկ աշխարհական արժանացել են նախարարության պարգևների:

«Անդրանիկ Օզանյան» մեդալով պարգևատրվել են ԱՄՆ Հայոց Արևմտյան թեմի Սան Ֆրանցիսկոյի Ս. Հովհաննես եկեղեցու հոգևոր հովիվ Տ․ Մեսրոպ քահանա Աշը և Հայաստանի Աստվածաշնչային ընկերության «Զինվորի Աստվածաշունչը» ծրագրի պատասխանատու տիար Մովսես Գաբուջյանը: «Գարեգին Նժդեհ» մեդալ հանձնվեց գնդերեցներ բարեշնորհ Մանավազդ սարկավագ Մկրտչյանին, Նարեկ սարկավագ Թորգոմյանին և Հարություն սարկավագ Մարտիրոսյանին:

Շնորհաբաշխությունից հետո Ամենայն Հայոց Կաթողիկոսը, իր հայրական օրհնությունն ու պատգամը փոխանցելով ներկաներին Հայոց բանակի օրվա կապակցությամբ, գոհունակությամբ արձանագրել է, որ նվիրական այս տոնին Մայր Աթոռ Ս. Էջմիածնում աղոթք բարձրացվեց առ Աստված Հայրենիքի շենացման, հայ ժողովրդի բարօր կյանքի և Հայոց բանակի անսասանության համար:

«Դուք՝ բոլորդ, լավ գիտեք, թե հավատքն ու աղոթքն ինչպիսի հրաշագործ զորություն ունեն: Ահա, թե ինչի համար, սիրելիներ, մենք կարևոր ենք նկատում, որպեսզի մեր Հայոց բանակի զինվորներն ու հրամանատարներն աղոթքի կանգնեն մեր ժողովրդի և հայ հոգևորականների հետ միասին, որովհետև այդ միասնական աղոթքը երկինք պիտի բարձրանա և ընդունելի պիտի լինի Աստծո կողմից, և երկնքից խաղաղության շնորհները, հաղթության շնորհներն առատորեն պիտի հեղվեն մեր կյանքից ներս»,- ասել է Հայոց Հովվապետը:

Նորին Սրբությունը նաև հաստատել է, որ հայ հոգևորականը պատմության ընթացքում մշտապես եղել է իր զինվորի ու զորավարի կողքին թե՛ խաղաղ կյանքի պայմաններում և թե՛ պատերազմական իրավիճակներում: Փառք հայտնելով Տիրոջը Հայոց բանակում հոգևորականների՝ որպես գնդերեցների զինվորների կողքին ծառայության համար՝ Վեհափառ Հայրապետը հաստատել է, որ հայ եկեղեցականներն ունեն հայրենիքի զինվորը լինելու և խաչը սրով փոխարինելու գիտակցությունը:

Միջոցառմանը Նորին Սրբությունն իր գնահատանքն է հայտնել ՀՀ ՊՆ նախարարին և բանակի բոլոր զորահրամանատարներին հանուն հայրենիքի նվիրյալ ծառայության և Հայոց բանակում սպասավորող հայ հոգևորականների հանդեպ ցուցաբերվող բարյացակամ, ուշադիր վերաբերմունքի ու զորակցության համար: Վեհափառ Հայրապետը նաև իր շնորհավորանքներն է հղել պարգևատրված զինվորականներին՝ մաղթելով նրանց ապրել ապահով և անվտանգ կյանքով, հույսով և լավատեսությամբ շարունակել իրենց ծառայությունը, որով պիտի կարողանան կերտել հզոր և շեն հայրենիք:

Վերջում Գարեգին Երկրորդ Ամենայն Հայոց Կաթողիկոսը մաղթել է, որ Բարձրյալ Աստված մշտապես օգնական լինի Հայոց բանակին, պահի-պահպանի այն սիրո մեջ և իր հաղթական Աջի ներքո:

 

Լրահոս
ՌԴ մեկնել ցանկացողները հացադուլ են անում Կառավարության դիմաց. ՈՒՂԻՂ Եվրասիական միջկառավարական խորհրդի նիստը կկայանա Երևանում Գագիկ Ծառուկյանի խափանման միջոցի հարցով նիստը չկայացավ Սպասեք մի երեք–չորս ժամ և ամեն ինչ կիմանաք. Հրայր Թովմասյան Ամուլսարի հանքի շահագործմանը կողմ համայնքների բնակիչների ակցիան՝ ԱԺ-ի դիմաց. ՈՒՂԻՂ Երևանում անշարժ գույքի նկատմամբ հետաքրքրությունը նվազել է, մարզերում՝ հակառակը Իշխանությունը պետք է մեր քաղաքացիներին նախապատրաստի ճակատում ուրվագծվող տարբեր սցենարների․ Տիգրան Աբրահամյան Այդպիսին են այսօր Հայաստանը ղեկավարող բոլշևիկները, ովքեր թույլ են տալիս, որ իրենց վրա «ոտքեր սրբողները» հեռանան երկրից. Դավիթ Խաժակյան Հանրային հեռուստաընկերությունը չի ներկայացանում բողոքի ցույցերը. «Մեդիա պաշտպան» Արևիկ Պետրոսյանը չի առաջադրվի ՍԴ նախագահի պաշտոնում, այլ թեկնածուի ևս չի առաջադրի Ի՞նչ փոփոխություններ են սպասվում անշարժ գույքի շուկայում. ասուլիսը՝ ուղիղ Հայաստանում կորոնավիրուսով վարակվելու հաստատված դեպքերը Դատարանը քննում է Գագիկ Ծառուկյանի խափանման միջոցի հարցը. ՈՒՂԻՂ Ռոհանի. ԱՄՆ հաջորդ ղեկավարը կհամաձայնի մեր պահանջներին Այսօրվա հոսանքազրկումների մասին Պոմպեոն սպառնացել է Չինաստանին և Ռուսաստանին՝ Իրանին զենք վաճառելու կապակցությամբ «Նորք» ԻԿՀ աշխատակազմի նամակը՝ նախագահին ու վարչապետին. Բայց և արդարությունն էլ ենթադրում է, որ... Մոսկվա-Երևան ևս երկու չվերթ կիրականացվի Երկրաշարժ՝ Շիրակի մարզում «Ժողովուրդ»․ Նախարարը կողմ է ՀՊՏՀ ուսանողների բողոքի ակցիաներին «Հրապարակ»․ Հնարավոր է՝ անսպասելի իրավիճակ առաջանա ՍԴ-ում «Ժողովուրդ»․ «Մեր ժամանակների հերոսը» մրցանակաբաշխության անակնկալը «Ժողովուրդ»․ Սահմանադրական դատարանում բուռն օր է սպասվում․ նախագահ են ընտրելու «Փաստ». Տասնյակ տարիների համար խոստում տալը հեշտ է, պատասխան տալու կարիք չի լինի «Հրապարակ». Աղմկահարույց դատավորն ու Ծառուկյանի գործը «Հրապարակ». Փաշինյանը ծանր է տանում բարձր մակարդակի հանդիպումների բացակայությունը «Փաստ». Լուրջ հակասություններ են ի հայտ եկել Լևոն Տեր-Պետրոսյանի և Նիկոլ Փաշինյանի միջև «Փաստ». Ինչո՞ւ «Նորք» ինֆեկցիոն հիվանդանոցից ոչ մի բուժաշխատող չպարգևատրվեց ՕՐՎԱ ԽՈՐՀՈՒՐԴԸ: Սեպտեմբերի 23 Աշխարհի 9 ամենահարուստ մարդկանց կարողությունը նվազել է 23 մլրդ դոլարով. Forbes Ջերմուկում բերման են ենթարկել Ամուլսարի շահագործմանը դեմ քաղաքացիներից երկուսին. ՈՒՂԻՂ Նորակոչիկները երդվել են Ակցիա՝ Ջերմուկի քաղաքապետարանի դիմաց (տեսանյութ) Արագածոտնի մարզպետը վարակվել է կորոնավիրուսով. նա հիվանդանոցում է Կգործի նպաստների նոր համակարգ Ռուսաստանը հոկտեմբերին կգրանցի կորոնավիրուսի դեմ արդեն 2-րդ պատվաստանյութը Վարդենիսի թիվ 3 դպրոցի տնօրենի և անձնակազմի 4 անդամի մոտ կորոնավիրուս է հաստատվել Ռուսաստանում ՍՈՒ-30 ռազմական ինքնաթիռ է կործանվել Արսեն Թորոսյանը քննադատությունունների կենտրոնում է. «Մեդիա պաշտպան» ԿԽՄԿ ներկայացուցիչները այցելել են Ադրբեջանում ձերբակալված Հայաստանի քաղաքացիներին
Խմբագրի ընտրություն
website by Sargssyan